बिहारमधील डॉक्टर्सच्या आरोग्याची काळजी घेणार धुळ्यातील किऑस्क !

    दिनांक  15-Apr-2020 18:39:52   
|

sangram limaye_1 &nb



नवी दिल्ली
: कोरोना रुग्णांची तपासणी करताना आणि त्यांच्या घशातील द्रवाचा नमूना घेताना डॉक्टर्सना अतिशय काळजी घ्यावी लागते. डॉक्टर्सचे आरोग्य जपणे महत्वाचे आहे, ध्यानात घेऊन धुळ्यातील कोरोना वॉरियर अभियंता संग्राम लिमये यांनी तयार केलेल्या कोरोना स्वॅप किओस्कचे भारतीय लष्कराच्या बिहारमधील दारुगोळा कारखान्यामध्ये उत्पादन केले जाणार आहे.


धुळ्यातील या कोरोना वॉरियरशी मुंबई तरुण भारतने विशेष संवाद साधला असता ते म्हणाले की, कोरोना प्रादुर्भावामुळे सध्या भारतासह संपूर्ण जगभरात एक प्रकारचे नैराश्य पसरले आहे. जगातील अन्य प्रगत देशांपेक्षा भारताची स्थिती सध्या चांगली असली तरीदेखील काळजी घेणे अत्यावश्यक आहे. सध्या आपण सर्व घरातच असलो तरीही डॉक्टर, आरोग्य कर्मचारी, सफाई कर्मचारी, पोलीस आणि प्रशासनाचे कर्मचारी अविरत कष्ट करीत आहेत.



त्यातही डॉक्टर्सची भूमिका सर्वांत महत्वाची आहे. कारण संशयितांच्या घशातील द्रवपदार्थाचे नमूने घेणे, त्यांची चाचणी करणे, कोरोनाबाधित आढळल्यास त्याचे विलगीकरण आणि उपचार करणे, असे अतिशय महत्वाची जबाबदारी त्यांच्या खांद्यावर सध्या आहे. त्यासाठी डॉक्टर आणि आरोग्य कर्मचाऱ्यांना पीपीई सूट परिधान करूनच काम करावे लागते. देशात पीपीई किटचा पुरेसा साठा असल्याचे सरकारने सांगितले असले तरिही बऱ्याचदा त्यांचा पुरवठा होण्यास विलंब होतो.



त्यासंदर्भात एका इंग्रजी दैनिकात कोरोनाच्या संशयित रुग्णांचे घशाचे स्वॅप घेण्यासाठी एक किऑस्क ( बंदिस्त काचेची केबिन ) तयार करण्यात आल्याचे वृत्त माझ्या वाचनात आले. तिन्ही बाजूंनी बंदिस्त असलेल्या या किऑस्कमुळे डॉक्टर व रुग्ण यामध्ये पुरेसे अंतर राखणे शक्य होते. त्यामुळे डॉक्टर्सना कोरोनाची लागण होण्याचा धोका कमी होतो. त्याची किंमत सुमारे ९९ हजार रूपये असल्याचे समजले. मात्र, मी स्वत: स्थापत्त्य अभियंता असल्याने मी त्या किऑस्कचा बारकाईने अभ्यास केला आणि त्याची निर्मिती कमीत कमी किमतीत धुळ्यातच करणे शक्य असल्याचे लक्षात आले. त्यानुसार माझ्या सहकाऱ्यांच्या मदतीने मी त्याची निर्मिती केली आणि धुळ्यातील शासकीय वैद्यकीय रुग्णालयास ते किऑस्क भेट दिले.



भारतीय लष्कराने घेतली दखल


सदर किऑस्कचे छायाचित्र आणि चित्रफित लिमये यांनी समाजमाध्यमांवर प्रसारित केली होती आणि ती मोठ्या प्रमाणावर व्हायरलदेखील झाली. अखेर ती पोहोचली बिहारमधील नालंदा येथे असलेल्या भारतीय लष्कराच्या दारुगोळा कारखान्याच्या (ऑर्डिनन्स फॅक्टरी) महाव्यवस्थापकांपर्यंत. योगायोगाने ते महाव्यवस्थापक मराठीच, त्यांच्या एका व्हॉट्स एप समुहात हे त्यांच्या नजरेस पडले. त्यांनी आपल्या अन्य एका मराठी सहकाऱ्याच्या मदतीने संग्राम लिमये यांच्याशी संवाद साधला आणि दारुगोळा कारखान्यामध्ये सदर किओस्कची निर्मिती करण्याची तयारी दाखविली. किओस्कचे मोठ्या प्रमाणावर उत्पादन व्हावे अशीच लिमये यांची इच्छा होती, त्यामुळे त्यांनी कऑस्कचा आराखडा (डिझाईन) दारुगोळा कारखान्यास दिला.


आता या कारखान्यामध्ये सदर किओस्कचे उत्पादन केले जाणार असून बिहारमधील इस्पितळांमध्ये ते पुरवले जाणार आहेत. त्याचप्रमाणे भारतीय लष्कराच्या देशभरात विविध ठिकाणी असलेल्या दारुगोळा कारखान्यांनादेखील हा आराखडा दिला जाणार असून त्याचे मोठ्या प्रमाणावर उत्पादन करणे आता शक्य होणार आहे.किओस्कसोबत जीवरक्षक प्रणालीवर (व्हेंटिलेटर) असलेल्या रुग्णांची काळजी घेणाऱ्या डॉक्टर्ससाठी अतिशय महत्वाचे असलेले इन्ट्यूबेशन बॉक्स हे लहानसे उपकरणदेखील कमीत कमी किमतीत कसे बनवता येईल, याचा आराखडा बनवून देण्याची मागणी दारुगोळा कारखान्यातर्फे करण्यात आली आहे.


किऑस्कचे जास्तीत जास्त प्रमाणात उत्पादन व्हावे


आम्ही तयार केलेल्या किऑस्कची किंमत केवळ ४५ हजार रूपये आहे. ज्याप्रमाणे भारतीय लष्कराने त्याची बिहारसाठी निर्मिती करण्यास पुढाकार घेतला आहे, तसाच पुढाकार जर केंद्र व राज्य सरकार, सामाजिक संस्था, कॉर्पोरेट कंपन्या यांनी घेतला तर त्याची किंमत आणखी कमी होणे आणि देशभरात अगदी लहानातल्या लहान गावापर्यंत किऑस्क पोहोचविणे शक्य होणार आहे. त्याचा आराखडा बनविण्यामागे आमचा कोणताही आर्थिक स्वार्थ नाही. आपल्या सर्वांच्या आरोग्यासाठी झटणारे डॉक्टर व आरोग्य कर्मचाऱ्यांप्रती असलेली एक जबाबदारी यातून त्याची निर्मिती आम्ही केली आहे, अशी प्रतिक्रिया लिमये यांनी दैनिक मुंबई तरुण भारतशी बोलताना दिली.
आता महाMTBच्या बातम्या आणि लेख मिळवा एका क्लिकवर. Facebook, Twitter, Helo वर आम्हाला फॉलो करा, महाMTB You tube चॅनलला सबस्क्राईब करा. डाऊनलोड करा महाMTB App.