दिलासादायक ! देशातील पहिले दोन रुग्ण ‘कोरोना’मुक्त

मुंबई : देशातील पहिले ‘कोरोना’बाधित रुग्ण म्हणून उपचार घेत असलेले पुण्यातील दोन जण बुधवारी गुढीपाडव्याला ‘कोरोना’मुक्त होऊन घरी परतले. मुंबईतील कस्तुरबा रुग्णालयातील बाराजण कोरोनामुक्त झाले आहेत. मात्र काही दिवस त्यांना डॉक्टरांच्या देखरेखीखाली रुग्णालयातच ठेवण्यात येणार आहे. होळीला कोरोनाबाधित ठरलेले पुण्यातील हे दोघे गुढीपाडव्याला कोरोनामुक्त झाल्याचे सांगून या रुग्णांवर तसेच राज्यातील विविध रुग्णालयात असलेल्या ‘कोरोना’बाधितांवर उपचार करणाऱ्या वैद्यकीय अधिकारी, कर्मचाऱ्यांचे उपमुख्यमंत्री अजित पवार यांनी आभार मानले आहेत.

अत्यावश्यक कारणांशिवाय घराबाहेर पडणाऱ्यांवर पोलिस कारवाई करतीलच, परंतु जीवनावश्यक वस्तंची वाहतूक करणाऱ्यांना कोणताही त्रास होणार नाही, याची दक्षता घेण्यात येत असल्याचेही त्यांनी सांगितले. जीवनावश्यक वस्तूंचा अवैध साठा आणि चढ्या दराने विक्री करणाऱ्यांवर गुन्हे नोंदवून कारवाई करण्यात येईल, असा इशाराही त्यांनी दिला आहे.

अमेरिकेने ‘लॉकडाऊन’च्या अंमलबजावणीसाठी लष्कराची मदत घेतली आहे. या पार्श्वभूमीवर राज्यातील जनतेने अत्यावश्यक गरजेशिवाय घराबाहेर पडणे टाळावे, असे आवाहन पवार यानी केले.