मनोरंजन होत नाही म्हणून ‘अथांग सावरकर’ रद्द; शिवसेनेचे शरद पोंक्षेंना पत्र

मुंबई : दि. २७ फेब्रुवारी रोजी ‘मराठी भाषादिना’निमित्त शिवसेनाप्रणित स्थानिय लोकाधिकार समिती महासंघाकडून मुंबईतील रवींद्र नाट्य मंदिर येथे आयोजित करण्यात आलेला ‘अथांग सावरकर’ हा कार्यक्रम अचानक रद्द करण्यात आला आहे. स्वातंत्र्यवीर सावरकरांवर आधारित ‘अथांग सावरकर’ हा कार्यक्रम मनोरंजन होत नाही म्हणून रद्द करण्यात आला असल्याची सबब देणारे पत्र महासंघाने अभिनेते शरद पोंक्षे यांना पाठवले आहे.

महासंघाने लिहिलेल्या पत्रात म्हटले की, “दि. २७ फेब्रुवारी रोजी ’मराठी भाषा दिवसाच्या’ कार्यक्रमासंबंधी समिती महासंघाच्या कार्यकारिणी बैठकीत सर्वच सदस्यांनी यंदाच्या वर्षी भाषा दिवसाच्या निमित्ताने मनोरंजनात्मक कार्यक्रम आयोजित करावा, अशी इच्छा व्यक्त केली. परंतु, आपल्यासोबत चर्चा झाल्यानुसार आपला ’अथांग सावरकर’ हा कार्यक्रम ठेवणे शक्य नाही. महासंघाचे सरचिटणीस अनिल देसाई यांनादेखील आपला कार्यक्रम अपेक्षित होता परंतु समिती सदस्यांच्या मागणीनुसार तो ठेवणे शक्य होत नसल्यामुळे आम्ही हा कार्यक्रम रद्द करत आहोत.”