झुंज अपयशी ; हिंगणघाट पीडितेच्या मृत्यू

    दिनांक  10-Feb-2020 10:23:56

hinganghat_1  H

हिंगणघाट गावाच्या नागरिकांचा रुग्णालयासमोर ठिय्या आंदोलन...

 
नागपूर : हिंगणघाट जळीतकांडातील पीडित तरुणीची अखेर मृत्यूशी झुंज संपली. सोमवारी पहाटे साडेचार वाजण्याच्या सुमारास पीडितेला ह्रदयविकाराचा झटका आला. अखेर सकाळी ६ वाजून ५५ मिनिटांनी तिची प्राणज्योत मालवली. पीडितेवर उपचार करणाऱ्या डॉक्टरांनी यासंदर्भातील माहिती पत्रकार परिषद घेवून दिली. दरम्यान, पीडितेचा मृत्यू झाल्याची बातमी समजताच हिंगणघाटमध्ये पोलीस बंदोबस्त वाढवण्यात आला आहे. आजच न्याय द्यावा अशी मागणी करत कुटुंबीयांनी मागणी केली आहे. हिंगणघाटच्या ग्रामस्थांनी रुग्णालयासमोर ठिय्या आंदोलन केले आहे.
 
वर्धा जिल्ह्याच्या हिंगणघाटमधील नांदोरी चौकात ३ फेब्रुवारीला सकाळी साडेसात वाजण्याच्या सुमारास पीडित तरुणीला आरोपी विकी नगराळे याने पेट्रोल टाकून पेटवल्याची घटना घडली होती. या घटनेमुळे हिंगणघाट हादरून गेले होते. गेल्या सात दिवसांपासून पीडित तरुणीवर नागपूरच्या ऑरेंज सिटी रुग्णालयात उपचार सुरू होते. घटनेच्या पहिल्या दिवसापासूनच पीडितेची प्रकृती चिंताजनक होती. उपचारादरम्यान तिच्यावर चार वेळा शस्त्रक्रिया करण्यात आली होती.
 
पीडितेचा रक्तदाब नियंत्रणात नसल्याने तिला श्वसनाला त्रास होत होता. त्यानंतर तिला व्हेंटीलेटरवर ठेवले होते. रविवारी तिच्यावर चौथी शस्त्रक्रीया केल्यानंतरही तिची प्रकृती खालावतच होती. सोमवारी पहाटे साडेचार वाजण्याच्या सुमारास पीडितेला ह्रदयविकाराचा झटका आला होता. त्यानंतर डॉक्टर तिच्यावर उपचार करत असताना सकाळी ६ वाजून ५५ मिनीटांनी तिचा मृत्यू झाला.