बोरिवली नॅशनल पार्कमध्ये खासगी वाहनांना यापुढे प्रवेशबंदी; उद्यानाच्या सुरक्षेला तंत्रज्ञानाचे कवच

उद्यानाअंतर्गत पर्यटकांच्या दळणवळणाकरिता पर्यावरण पूरक १६ इल्केट्रिकल बसचे कार्यान्वित करणार असल्याची माहिती राज्याचे अपर प्रधान मुख्य वनसंरक्षक, वन्यजीव (पश्चिम) सुनील लिमये यांनी दिली. या बस 'नॅशनल हाई स्पीड रेल कॉर्पोरेशन लिमिटेड'कडून उद्यान प्रशासनाला मिळणार आहेत. काॅर्पोरेशनकडून उभारण्यात येणारा 'मुंबई-अहमदाबाद बुलेट ट्रेन प्रकल्प' राष्ट्रीय उद्यान आणि तुंगारेश्वर अभयारण्याला छेदून जात आहे. त्यासाठी पर्यावरणीय उपाययोजनाअंतर्गत या १६ बस देण्यात येणार आहेत. उद्यानाच्या सीमेवर आणि अंतर्गत भागातील अंतिक्रमणांच्या दैनंदिन मूल्यांकनासाठी उपग्रह छायाचित्रांची यापुढे मदत घेतली जाणार आहे. उपग्रह छायाचित्रणामुळे नव्या अतिक्रमणांचे मूल्यांकन करणे प्रशासनाला सोयीचे होणार आहे. याशिवाय उद्यानाच्या गाभा क्षेत्राच्या चोवीस तास संरक्षणाकरिता चौक्या उभारण्यात येणार आहेत. अतिक्रमण धारकारांकडून वनकर्मचाऱ्यांवर सातत्याने हल्ले होत असतात. अशा संकटसमयी गस्तीवर असणाऱ्या कर्मचाऱ्यांकडे वरिष्ठांसोबत संवाद साधण्यासाठी कोणतेही साधन नसते. त्यासाठी उद्यानाच्या १०४ चौ.किमी क्षेत्रामध्ये उपलब्ध असणारी 'वायरलेस संप्रेषण प्रणाली' उभारण्यात येणार आहे. या यंत्रणेमुळे वनकर्मचाऱ्यांना एकमेकांशी संवाद साधता येईल.