सेन्सेक्स आजही तेजीत!

गुंतवणूकदारांना सध्या अर्थसंकल्पाचे वेध...

मुंबई : गुंतवणूकदारांनी खरेदीचा ओघ कायम ठेवल्याने शुक्रवारी मुंबई शेअर बाजारात सलग दुसऱ्या दिवशी तेजी दिसून आली. मुंबई शेअर बाजाराचा सेन्सेक्स १२.८१ अंकांनी वधारून ४१९४५ अंकांवर बंद झाला. राष्ट्रीय शेअर बाजाराच्या निफ्टीत मात्र ३ अंकांची किरकोळ घसरण झाली. निफ्टी १२३५२ अंकांवर बंद झाला.


गुंतवणूकदारांना सध्या अर्थसंकल्पाचे वेध लागले आहेत. यंदा अर्थसंकल्पात सर्वसामान्यांना सरकारकडून कर दिलासा देण्याची शक्यता आहे. कोर्पोरेट्सकडून तिसऱ्या तिमाहीचे निकाल जाहीर होत असून त्यामुळे बाजारात उत्साहाचे वातावरण आहे. आजच्या सत्रात सेन्सेक्सने पुन्हा एकदा रेकॉर्ड केला. निर्देशांक सकाळच्या सत्रात १३१ अंकांनी वधारून ४२०६३ अंकापर्यंत पोहचला होता. निफ्टीने २९ अंकांची वाढ नोंदवत १२३८५ चा स्तर गाठला होता.

आजच्या सत्रात मिडकॅप आणि स्मॉलकॅप शेअरला मागणी दिसून आली. बीएसई मिडकॅप ०.५० टक्के आणि स्मालकॅप ०.४१ टक्क्यांनी वधारला. तोटा आणि कर्जामुळे अडचणीत आलेल्या आघाडीच्या टेलिकॉम कंपन्यांना गुरुवारी मोठा न्यायालयीन हादरा बसला. परवाना शुल्क, स्पेक्ट्रम शुल्क आदी शुल्कापोटी सरकारला देय असलेली थकीत रक्कम व त्यावरील दंड, व्याज यातून या कंपन्यांना दिलासा देण्यास सर्वोच्च न्यायालयाने नकार दिला. व्होडाफोन आयडिया, भारती एअरटेल, टाटा टेलीसर्व्हिसेस यांच्यातर्फे दाखल करण्यात आलेल्या याचिका सर्वोच्च न्यायालयाच्या खंडपीठाने गुरुवारी फेटाळल्या. याचे पडसाद आज टेलिकॉम कंपन्यांच्या शेअरवर उमटले. आज व्होडाफोन आयडियाचा शेअर २५ टक्क्यांनी घसरला. भारती इन्फ्राटेलचा शेअर १० टक्क्यांनी घसरला. आजच्या सत्रात सेन्सेक्समधील १९ शेअर तेजीसह बंद झाले. ११ शेअर घसरले. तेजीत शेअरमध्ये रिलायन्स इंडस्ट्रीज, एचसीएल टेक या शेअरमध्ये वाढ झाली.