आता प्लॅटफॉर्म तिकिटावरही होणार प्रवास

    दिनांक  01-Aug-2019 17:01:46


 


मुंबई : वेळ खाऊ तिकिटांच्या रांगांपासून त्रस्त असलेल्या प्रवाशांसाठी रेल्वेने घेतलेला निर्णय हा थोडासा दिलासादायक ठरण्याची शक्यता आहे. रेल्वेच्या नव्या नियमांनुसार आपात्कालिन परिस्थितीत आता प्रवासी प्लॅटफॉर्म तिकिटावरही रेल्वेतून प्रवास करू शकणार आहेत. परंतु यासाठी रेल्वेने एक अट घातली आहे. प्लॅटफॉर्म तिकिटावरून प्रवास करण्याची मुभा रेल्वे दिली असून यासाठी संबंधित प्रवाशाला गार्ड किंवा टिसीचे परवानगी पत्र घ्यावे लागणार आहे. जर यासाठीही सदर प्रवाशाकडे वेळ नसल्यास ट्रेनमध्ये जाऊन नियमित प्रक्रिया पूर्ण करत प्रवास करू शकता. रेल्वेच्या नियमानुसार हे परवानगी पत्र रेल्वेचे गार्ड, टिसी किंवा अन्य अधिकाऱ्यांकडून घेता येऊ शकते.

 

ट्रेनमध्ये चढल्यानंतर प्रवाशाला याबाबत टिसीला माहिती द्यावी लागेल. त्यानंतर सदर प्रवाशाच्या इच्छित स्थळाचे त्यांच्याकडून तिकिट बनवून घेता येईल. परंतु यासाठी केवळ २५० रूपये दंडाच्या स्वरूपात द्यावे लागणार आहेत. तसेच ज्या श्रेणीतून प्रवास करायचा असेल, त्याच श्रेणीचे शुल्क भरावे लागेल. प्रवाशी ज्या रेल्वे स्थानकावर ट्रेनमध्ये चढला ते बोर्डिंग स्टेशन मानले जाणार आहे. परंतु याद्वारे प्रवसाची मुभा मिळणार असली तरी तिकिटाचे आरक्षण मात्र देण्यात येणार आहे. दरम्यान, सध्या प्लॅटफॉर्म तिकिटाची किंमत केवळ १० रूपये आहे. कोणतीही व्यक्ती जाणूबुजून अथवा फसवण्याच्या बहाण्याने या तिकिटावर प्रवास करत असेल, तर त्याला तुरूंगवारीही होऊ शकते. तसेच यासाठी १ हजार २६० रूपयांचा दंड किंवा तुरूंगवारी आणि दंड दोन्ही होऊ शकतो.