उन्नाव बलात्कार पीडितेची प्रकृती गंभीर

नवी दिल्ली : एकीकडे हैदराबाद बलात्कार आणि एनकाऊंटर प्रकरणी देशभरात उषाचे वातावरण असताना दुसरीकडे उन्नावमध्ये झालेल्या पीडितेवरील हल्ल्यासंदर्भात एक दुःखद बातमी आहे. उत्तर प्रदेशच्या उन्नाव बलात्कार पीडितेची जिवंत वाचण्याची शक्यता फारच कमी असल्याचे डॉक्टरांनी शुक्रवारी सांगितले.

डॉक्टरांनी दिलेल्या माहितीनुसार, "तिला जीवनरक्ष प्रणालीवर ठेवण्यात आले असून तिची प्रकृती अतिशय नाजूक आहे. डॉक्टरांकडून तिला वाचवण्याचे प्रयत्न केले जात आहेत. तरीही ती जिवंत राहील याची शक्यता फार कमी आहे."

बलात्कार प्रकरणात जामिनावर सुटलेल्या आरोपींनी पीडितेला गुरुवारी सुनावणीसाठी जात असताना जिवंत जाळले. यात ती ९० टक्के भाजली असून तिच्यावर रुग्णालयात उपचार सुरू आहेत. सुरुवातीला तिला उपचारासाठी लखनऊच्या रुग्णालयात दाखल करण्यात आले होते. यानंतर दिल्लीतील सफदरगंज रुग्णालयामध्ये घेऊन जाण्यात आले.