दिल्ली, कर्नाटकसह देशाच्या काही भागात कलम १४४ लागू 

नवी दिल्ली : गुरुवारी डावे पक्ष आणि मुस्लिम संघटनांनी नागरिकत्व कायद्याचा निषेध करण्यासाठी कर्नाटक, बिहारसह देशातील अन्य राज्यात बंद पुकारला. यावेळी सीपीआय-एम कामगारांनी बिहारमधील पटना, दरभंगासह अनेक शहरांमध्ये रेल्वे रुळांवर निदर्शने केली. दुसरीकडे, दिल्लीत कलम १४४ असूनही संवेदनशील भागात जमलेल्या अनेक निदर्शकांना ताब्यात घेण्यात आले. खबरदारीचा उपाय म्हणून डीएमआरसीने राजधानीतील ७ मेट्रो स्टेशन बंद ठेवली आहेत. कर्नाटकमध्येही पुढील तीन दिवस कलम १४४ लागू राहील (२१ डिसेंबर रात्रीपर्यंत). बंगळुरु येथे झालेल्या निदर्शनादरम्यान पोलिसांनी इतिहासकार रामचंद्र गुहा यांना ताब्यात घेतले आहे.

दिल्ली

कायदा व सुव्यवस्थेच्या कारणावरून दिल्लीतील लाल किल्ला परिसरात कलम १४४ लागू करण्यात आले आहे. असे असूनही येथे मोठ्या संख्येने निदर्शक जमले. पोलिसांनी अनेकांना ताब्यात घेतले आहे. निषेधाच्या पार्श्वभूमीवर डीएमआरसीने पटेल चौक, लोक कल्याण मार्ग, उद्योग भवन, आयटीओ, प्रगती मैदान, खान मार्केट आणि केंद्रीय सचिवालय मेट्रो स्थानके बंद ठेवली. जामिया आणि सीलमपूरमध्ये हिंसक निदर्शने झाल्यानंतर पोलिसांनी संवेदनशील भागात फ्लॅग मार्च काढला.

बिहार

नागरिकत्व कायद्याविरोधात राज्यातील अनेक शहरांमध्ये निदर्शने झाली. माकपच्या कामगारांनी दरभंगा आणि पाटण्यात रेल्वे रुळ व महामार्ग रोखले.

कर्नाटक

कलबुर्गी येथे डाव्या आणि मुस्लिम संघटनांनी काळे झेंडे दाखवून निदर्शने केली. याप्रकरणी पोलिसांनी २० जणांना ताब्यात घेतले. बंगळुरु येथे झालेल्या निषेधाच्या वेळी पोलिसांनी इतिहासकार रामचंद्र गुहा यांना ताब्यात घेतले. राज्यात बंदमुळे पोलिस सज्ज झाले आहेत. बंगलोर, कलबुर्गी, दक्षिणा कन्नड आणि त्याच्या आसपासच्या जिल्ह्यांमध्ये पुढील तीन दिवस (२१ डिसेंबर रात्रीपर्यंत) कलम १४४ लागू राहील. मुख्यमंत्री बी एस येडियुरप्पा म्हणाले, "या निषेध आणि बंदच्या मागे कॉंग्रेसचा हात आहे. त्यांचे नेते या कारवाईला पाठिंबा देत आहेत. मुस्लिमांचीही जबाबदारी माझ्यावर आहे. मी सर्व लोकांना शांतता राखण्याचे आवाहन करतो."

महाराष्ट्र

मुख्यमंत्री उद्धव ठाकरे यांनी व्हिडिओ कॉन्फरन्सिंगद्वारे मुस्लिम समाजाच्या प्रतिनिधींशी संवाद साधला. नागरिकत्व कायदा व एनआरसीच्या निषेधा दरम्यान कायदा व सुव्यवस्था राखण्याचे आवाहन त्यांनी केले.