टीजेएसबी सहकारी बँकेच्या अध्यक्षपदी विवेक पत्की; उपाध्यक्षपदी शरद गांगल

टीजेएसबी सहकारी बँकेच्या संचालक मंडळाची बिनविरोध निवड

ठाणे : देशात सहकार क्षेत्रात सातत्याने आघाडीवर असणाऱ्या टीजेएसीबी सहकारी बँकेच्या संचालक मंडळाची निवडणूक बिनविरोध झाली. सदर संचालक मंडळाचा कालावधी २०२० ते २०२५ असा पाच वर्षांसाठी आहे. सी. नंदगोपाल मेनन, सीए विवेक पत्की, रमेश कनानी, ऍड.प्रदिप ठाकूर, दिलीप सुळे, अनुराधा आपटे, मधुकर खुताडे या विद्यमान संचालकांसह डॉ. अश्विनी बापट, शरद गांगल, ऍड. समीर कांबळे, सीए वैभव सिंघवी यांची बिनविरोध निवड झाली आहे.

बँकेच्या संचालक मंडळात लेखा परिक्षक, उद्योजक, मनुष्यबळ विकास, विधिज्ञ, आर्थिक-सहकार-बॅंकिंग जाणकार आणि सामाजिक कार्यकर्ते अश्या विविध क्षेत्रातील घटकांचा समावेश आहे. संचालक मंडळाच्या बिनविरोध निवडीने अनुभव, तज्ञता आणि तरुणाई याचे नेमके संतुलन साधले आहे. टीजेएसबी सहकारी बँकेच्या संचालक मंडळाची निवडणूक रविवार दिनांक १५ डिसेंबर रोजी बहुराज्यीय सहकारी संस्थाच्या वर्ष २००२ च्या कायद्यानुसार झाली. ठाणे महानगर पालिकेचे उपायुक्त संदीप माळवी यांनी निवडणूक अधिकारी म्हणून काम पाहिले. बँकेच्या सर्वसाधारण सभेत निवडणूक अधिकारी संदीप माळवी यांनी निवडणूकी बाबत घोषणा केली.