'प्रभू रामनामासाठी शिवसेनेला सोनिया गांधींसमोर नाक घासावे लागणार'

नवी दिल्ली : महाराष्ट्रात शिवसेना, राष्ट्रवादी आणि काँग्रेसने एकत्र येत महाविकास आघाडीची स्थापना करत महाराष्ट्रात सरकार स्थापन केले. परंतु तीन वेगवेगळ्या विचारधारेवर काम करणारे हे पक्ष आता किती काळ एकत्र युती टिकवतील याबाबत साशंकता येते. यात मात्र सत्तेसाठी हिंदुत्व सोडलेल्या शिवसेना पक्षावर चौफेर टीका होताना दिसून येते. केंद्रीय मंत्री व भाजपचे नेते गिरीराज सिंह यांनी शिवसेनेने बाळासाहेबांचा आत्मा (हिंदुत्व) सोनिया गांधींकडे गहाण ठेवला अशा शब्दांत टीका केली. तर 'शिवसेनेला आता रामनामासाठी देखील १० जनपथवर नाक घासावे लागणार आहे' असे देखील म्हणले आहे.

केंद्रीय मंत्री गिरीराज सिंह हे बिहारमधील बेगुसराय मतदारसंघाचे खासदार आहे. काल महाराष्ट्रात झालेल्या महाविकासआघाडीच्या शपथविधीनंतर त्यांनी ट्विट करत शिवसेनेवर निशाणा साधला. ते आपल्या ट्विटमध्ये म्हणतात कि

,''शिवसेनेने बाळासाहेबांचा आत्मा सोनिया गांधी यांच्या हाती गहाण ठेवला आहे. आता शिवसैनिकांना प्रभू श्रीराम आणि अयोध्येचे नाव घेण्यासाठी दहा जनपथ येथे नाक घासावे लागेल. शिवसेनेला पाहून अंदाज येऊ शकतो की मुघलांनी हिंदुस्तानमध्ये पाय कसे रोवले असतील."