आदित्य ठाकरे 'इतक्या' संपत्तीचे मालक

मुंबई
: आदित्य ठाकरे यांनी शक्तिप्रदर्शन करत वरळी विधानसभा मतदारसंघातून अर्ज भरला. आदित्य ठाकरे हे ठाकरे कुटुंबातील पहिले व्यक्ती आहेत जे निवडणूक रिंगणात उतरले आहेत. त्यामुळे शिवसेनेने आता रिमोट कंट्रोलद्वारे सत्ता चालविण्याची परंपरा मोडीत काढली. उमेदवारी अर्जासोबत दाखल केलेल्या प्रतिज्ञापत्रात आदित्य ठाकरे यांनी आपल्या संपत्तीचा अहवाल दिला आहे. त्यानुसार आदित्य ठाकरे यांच्याकडे एकूण संपत्ती ११ कोटी ३८ लाख रुपये असल्याचे म्हटले आहे.

यामध्ये बँक ठेवी १० कोटी ३६ लाख असल्याचे नमूद करण्यात आले आहे. संपत्तीचे विवरण देताना त्यांनी बँकेमध्ये १० कोटी ३६ लाख रुपये त्याचबरोबर बॉण्ड शेअर्समध्ये २० लाख ३९ हजारांची गुंतवणूक केली असून आदित्य यांच्याकडे एक बीएमडब्यू गाडी असल्याचे या प्रतिज्ञापत्रात म्हटले आहे. या गाडीची एकूण किंमत ६ लाख ५० हजार रुपये असल्याचे म्हटले आहे. आदित्य यांनी आपल्याकडे ६४ लाख ६५ हजारांचे दागिने असून इतर संपत्ती एकूण १० लाख २२ हजारांची असल्याचे सांगितले आहे. आदित्य यांच्या उमेदवारीमुळे पहिल्यांदाच ठाकरे कुटुंबातील व्यक्तीची संपत्ती समोर आली आहे.

 

 

हजारो शिवसैनिकांच्या उपस्थितीत रोड शो करत आदित्य ठाकरेंनी उमेदवारी अर्ज दाखल केला. आदित्य यांच्या मातोश्री रश्मी ठाकरे आणि लहान भाऊ तेजस ठाकरे हेही यावेळी उपस्थित होते. ठाकरे कुटुंबातील कोणीही यापूर्वी निवडणूक न लढविल्याने त्यांच्या संपत्तीबद्दल फक्त तर्क वितर्कच चर्चिले जात होते परंतु आदित्यच्या उमेदवारीने याबाबतची माहिती समोर आली आहे.