जामनेर : देशभरातील दुर्मीळ औषधी वनस्पतींवर संशोधन व अध्यापन करणारी नँशनल इन्स्टीट्युट ऑफ मेडिसीनल प्लाँट या संस्थेची जामनेरला उभारणी होणार असुन, दिल्ली येथील आयुष मंत्रालयाच्या पथकाने शनिवारी जागेची पाहणी केली. अशा स्वरुपाची ही देशातील पहिलीच संस्था असेल, असे पथकातील सदस्यांनी सांगितले.

नँशनल मेडिसीनल प्लाँट बोर्ड या दिल्ली येथील आयुष मंत्रालयातील उप मुख्यकार्यकारी अधिकारी पद्मप्रिया बाळकृष्ण, डॉ. एन.सी.अग्रवाल, डॉ. तनुजा नेसरी, डॉ. मिलींद निकम, डॉ. धनंजय कुलकर्णी, डॉ. संजय तलमले, डॉ. रुशिकेश कोल्हे यांनी नगराध्यक्ष साधना महाजन सोबत गारखेडे परिसरातील जागेची पाहणी केली. या संशोधन केंद्रासाठी ५० एकर जागा लागणार आहे. प्रस्तावीत जागेजवळच वाघुरचे बँक वाटर असल्याने त्याचा फायदा संस्थेस होवू शकतो.

या प्रस्तावीत संस्थेत औषधी वनस्पती विषयाशी निगडीत पदवी, पदव्युत्तर अभ्यासक्रमासह संशोधनाची सुवीधा उपलबध्द होणार असल्याने त्याचा उपयोग वनस्पतीशास्त्र विषयातील संशोधकांना होईल. खांदेशातील सातपुडा पर्वत क्षेत्रासह अजिंठा लेणी परिसरासह राज्यातील इतर भागात आढळणार्या औषधी वनस्पतींची सखोल शास्त्रीय माहिती या संस्थेत ठेवली जाईल.

 जामनेरला देशातील पहिली औषधी वनस्पती संशोधन संस्थेची ऊभारणी व्हावी यासाठी केंद्राकडे पाठपुरावा सुरु होता. येत्या दोन वर्षात ५० एकर क्षेत्रात संस्थेची ऊभारणी होवुन कामास सुरुवात होईल. राज्यातील संशोधक व अभ्यासकांना याचा फायदा होणार असुन ते जिल्ह्याच्या विकासाचे केंद्र ठरेल.

- गिरीष महाजन,