भारताचा शौर्यवीर ‘कुलदीप’

१९७१ साली पाकिस्तानी लष्कराने लोंगेवाला येथे हल्ला केला. पण, भारतीय लष्कराने पाकिस्तानच्या हल्ल्याला तोडीस-तोड उत्तर देत पाकचा संपूर्ण पराभव केला. पाकिस्तानच्या या हल्ल्याला निष्प्रभ करणारे पराक्रमी नेतृत्व होते ब्रिगेडियर कुलदीप सिंग चांदपुरी यांचे. २२ नोव्हेंबर, १९४० रोजी एका शीख कुटुंबात ब्रिगेडियर कुलदीप सिंग चांदपुरी यांचा जन्म झाला. कुलदीप सिंग यांच्या कुटुंबीयांचा संबंध अविभाजित भारताच्या पंजाबमधील मोंटागोमरीशी होता. कुलदीप यांच्या जन्मानंतर त्यांचे कुटुंबीय बालाचौर येथील चांदपूर रुडकी येथे आले. १९६२ साली कुलदीप यांनी होशियारपूर येथील सरकारी महाविद्यालयातून पदवी प्राप्त केली. याचवेळी ते एनसीसी अर्थात नॅशनल कॅडेट कॉर्पसचेदेखील सक्रिय सदस्य होते. पदवी परीक्षा उत्तीर्ण झाल्यानंतर त्यांनी एनसीसीच्या परिक्षेतदेखील यश मिळवले. ऑफिसर्स ट्रेनिंग अकॅडमी, मद्रास येथे प्रशिक्षण पूर्ण केल्यानंतर ते १९६३ साली भारतीय लष्करात भरती झाले. विशेष म्हणजे भारतीय लष्कराची सेवा करणाऱ्या आपल्या कुटुंबातील तिसऱ्या पिढीचे ते लष्करी अधिकारी होते.

ब्रिगेडियर पदावरून निवृत्त झाल्यानंतर त्यांची चंदीगड नगरपालिकेवर सदस्य म्हणून नियुक्ती झाली. २००६ ते २०११ पर्यंत ते या पदावर राहिले. याच काळात त्यांनी नागरिकांना मूलभूत सोयी-सुविधा मिळाव्या म्हणून आणि खेळ-क्रीडा आदी मुद्द्यांवर आवाज उठवला. पण, कुलदीप सिंह चांदपुरी यांना आजही ओळखले जाते, ते त्यांच्या पाकिस्तानविरोधातील लोंगेवाला युद्धातील धडाकेबाज कामगिरीमुळे. जे. पी. दत्ता यांचा १९९७ सालचा ‘बॉर्डर’ चित्रपट याच युद्धावर आधारित होता. भारतमातेच्या अशा बहादुर सुपुत्राचे गेल्या शनिवारी निधन झाले आणि देशाने एक सच्चा देशभक्त गमावला. ईश्वर कुलदीप सिंग चांदपुरी यांच्या आत्म्याला सद्गती देवो, ही प्रार्थना...