रस्ते स्वच्छतेसाठी पालिकेची नवी योजना; सातही परिमंडळांत जेटिंग टँकर भाड्याने घेणार

मुंबई : (Road Cleaning) मुंबईतील धुळीचे वाढते प्रदूषण रोखण्यासाठी आणि रस्ते स्वच्छ-सुंदर राखण्यासाठी महानगरपालिकेने एक मोठे पाऊल उचलले आहे. पालिकेच्या घनकचरा व्यवस्थापन विभागांतर्गत मुंबईतील सातही परिमंडळांमधील रस्ते धुण्यासाठी आधुनिक 'जेटिंग व्यवस्था' असलेले पाण्याचे टँकर भाड्याने घेण्यासाठी ई-निविदा मागविण्यात आल्या आहेत. पावसाळा वगळून एकूण १५० दिवसांच्या कालावधीसाठी हे कंत्राट दिले जाणार आहे.

 

​मुंबईसारख्या गजबजलेल्या शहरात वाहनांची वर्दळ आणि बांधकामांमुळे धुळीचे साम्राज्य निर्माण होते, ज्यामुळे हवेची गुणवत्ता खालावते. अशा परिस्थितीत पारंपरिक पद्धतींऐवजी हाय-प्रेशर जेटिंग वॉटर टँकर वापरणे अत्यंत महत्त्वाचे ठरते. हे टँकर तीव्र पाण्याच्या माऱ्याने रस्त्यांच्या कडेला आणि दुभाजकांवर साचलेली सूक्ष्म धूळ व माती पूर्णपणे उपसून काढतात. यामुळे डांबरी व सिमेंटचे रस्ते चकाचक तर होतातच, शिवाय हवेतील घातक तरंगते कण जमिनीवर बसून नागरिकांना श्वसनाच्या त्रासापासून मोठा दिलासा मिळतो.(Road Cleaning)

 

​महानगरपालिकेने सर्व सातही परिमंडळांसाठी एकत्रितपणे पण विभागनिहाय निविदा प्रक्रिया राबवल्यामुळे प्रशासकीय कामात मोठी सुसूत्रता येणार आहे.वेगवेगळ्या प्रभागांसाठी सुट्या निविदा काढण्याऐवजी परिमंडळ स्तरावर एकत्र प्रक्रिया केल्याने वेळेची मोठी बचत होईल.मोठ्या प्रमाणावर कंत्राट दिल्याने पालिकेचा खर्च मर्यादित राहून स्पर्धात्मक दरांचा फायदा होणार आहे.संपूर्ण मुंबईत एकाच दर्जाची साफसफाई सुनिश्चित करणे यामुळे शक्य होणार आहे.

​

​या कामासाठी विविध नामांकित कंपन्या, भागीदारी संस्था आणि कंपन्यांकडून ऑनलाईन अर्ज मागविण्यात आले आहेत. जे कंत्राटदार पालिकेकडे नोंदणीकृत नाहीत, त्यांना कंत्राट मिळाल्यापासून ३ महिन्यांच्या आत नोंदणी करणे बंधनकारक राहील, अन्यथा त्यांची बयाणा रक्कम जप्त केली जाईल. कंत्राटदारांना प्रत्येक परिमंडळासाठी स्वतंत्र स्क्रुटिनी फी भरावी लागेल. तसेच इच्छुक कंत्राटदारांना मागील ७ वर्षांत सरकारी क्षेत्रात अशाच कामाचा अनुभव आणि परिमंडळनिहाय आर्थिक उलाढाल असणे बंधनकारक आहे. या निविदेत 'जॉइंट व्हेंचर'ला परवानगी नाकारण्यात आली आहे.(Road Cleaning)