कामगारांच्या धोरणात्मक आणि कायदेशीर मागण्यांवर शासन सकारात्मक; मंत्री ॲड. आकाश फुंडकर; विविध संघटनांच्या प्रतिनिधींसोबत बैठक संपन्न

 

मुंबई : (Akash Fundkar) कामगारांच्या धोरणात्मक आणि कायदेशीर मागण्यांवर शासन सकारात्मक असल्याची भावना कामगार मंत्री ॲड. आकाश फुंडकर यांनी व्यक्त केली. राज्यातील कामगारांच्या विविध प्रश्नांवर प्रभावी उपाययोजना करण्याच्या दृष्टीने कामगार मंत्र्यांच्या अध्यक्षतेखाली सेंटर ऑफ इंडियन ट्रेड युनियन संघटनेच्या प्रतिनिधींसमावेत मंत्रालयातील दालनात बैठक पार पडली. यावेळी कंत्राटी, बांधकाम, घरकामगार, अंगणवाडी व आशा कर्मचाऱ्यांसह विविध घटकांच्या प्रलंबित मागण्यांवर सविस्तर चर्चा करण्यात आली.

 

यावेळी विविध उद्योग क्षेत्रांतील असंघटित कामगारांच्या प्रश्नांचे पुनरावलोकन, किमान वेतन सल्लागार मंडळाची स्थापना, कंत्राटी कामगारांचे प्रश्न, समान वेतन कायद्याची प्रभावी अंमलबजावणी, विविध उद्योगांसाठी किमान वेतन निश्चिती, सफाई तसेच घरकामगारांसाठी स्वतंत्र धोरण, तसेच अंगणवाडी व आशा कर्मचाऱ्यांना विविध सामाजिक सुरक्षा लाभ उपलब्ध करून देण्याबाबत चर्चा करण्यात आली.

 

 

यावेळी मंत्री अॅड. आकाश फुंडकर यांनी शासन कामगार कल्याणासाठी कटिबद्ध असल्याचे सांगितले. बांधकाम कामगार नोंदणी प्रक्रियेत पारदर्शकता आणण्यासाठी सध्या ४१ पथके कार्यरत असून तपासणी सुरू असल्याची माहिती त्यांनी दिली. आधार संलग्नीकरणाची प्रक्रिया वेगाने राबविण्यात येत असून पात्र घरकामगारांना संबंधित योजनांचा लाभ मिळावा यासाठी आवश्यक कार्यवाही सुरू असल्याचे त्यांनी सांगितले. राज्यातील कामगारांसाठी कल्याणकारी उपाययोजनांना अधिक बळकटी देण्यासाठी जुलै अखेरपर्यंत संबंधित कल्याणकारी मंडळाची स्थापना करण्यात येणार असल्याचेही त्यांनी सांगितले.

 

राज्यातील विविध कामगार घटकांच्या मागण्या आणि प्रश्नांचा सर्वंकष अभ्यास करून, आवश्यक ती पडताळणी पूर्ण झाल्यानंतर शासन स्तरावर योग्य ते धोरणात्मक निर्णय घेण्यात येतील. कामगारांच्या हिताचे प्रलंबित प्रश्न मार्गी लावण्यासाठी शासन सकारात्मक असून यासाठी सर्व संबंधित घटकांशी समन्वय साधून कार्यवाही करण्यात येईल, असेही मंत्री अॅड. मंत्री आकाश फुंडकर यांनी स्पष्ट केले. (Akash Fundkar)