अश्विन मुद्गल यांनी सिडकोच्या उपाध्यक्ष पदाचा पदभार स्वीकारला; प्रकल्प वेळेत पूर्ण करण्यास प्राधान्य देणार : अश्विन मुद्गल
Total Views |
मुंबई: (CIDCO Appointed) सिडको महामंडळाच्या उपाध्यक्ष तथा व्यवस्थापकीय संचालक पदाची सूत्रे अश्विन मुद्गल यांनी बुधवार, दि. १७ जून रोजी स्वीकारली. सिडकोचे मुख्य कार्यालय असलेले सिडको भवन, सीबीडी बेलापूर, नवी मुंबई येथे अश्विन मुद्गल यांनी उपाध्यक्ष तथा व्यवस्थापकीय संचालकपदाची सूत्रे स्वीकारली. सिडकोच्या उपाध्यक्ष तथा व्यवस्थापकीय संचालक पदी नियुक्ती होण्यापूर्वी अश्विन मुद्गल हे मुंबई महानगर प्रदेश विकास प्राधिकरणात अतिरिक्त महानगर आयुक्त पदावर कार्यरत होते.
सन २००७ च्या तुकडीतील भारतीय प्रशासकीय सेवा अधिकारी असलेल्या अश्विन मुद्गल यांनी आपल्या प्रशासकीय सेवेची सुरूवात नाशिक जिल्ह्याचे सहाय्यक जिल्हाधिकारी म्हणून केली. ते वाणिज्यिक शाखेचे पदवीधर आहेत. त्यानंतर पंढरपूर-सोलापूर येथे उपजिल्हादंडाधिकारी, सांगली जिल्हा परिषदेचे मुख्य कार्यकारी अधिकारी, सातारा व यवतमाळ येथे जिल्हाधिकारी, नागपूर महानगरपालिकेचे आयुक्त, नागपूर इम्प्रूव्हमेन्ट ट्रस्टचे अध्यक्ष आणि नागपूरचे अतिरिक्त विभागीय आयुक्त म्हणून त्यांनी कार्यभार सांभाळले आहेत.
हेही वाचा : राज्यात वाढणार आरटीओ कार्यालयांचे जाळे;नवीन आरटीओ कार्यालयांसाठी निकष निश्चित
प्रकल्प वेळेत आणि गुणवत्तापूर्ण करण्यास प्राधान्य देणार
“सिडको हे देशातील अग्रगण्य नियोजन व विकास महामंडळांपैकी एक असून, सिडकोतर्फे राबविण्यात येणाऱ्या वैविध्यपूर्ण महत्त्वाकांक्षी प्रकल्पांमुळे महाराष्ट्रासह देशाच्या विकासाला मोठा हातभार लागत आहे. सध्या सिडकोमार्फत साकारण्यात येत असलेले सर्व महत्त्वपूर्ण प्रकल्प नियोजित वेळेत आणि गुणवत्तापूर्ण पद्धतीने पूर्ण करणे हे माझे सर्वोच्च प्राधान्य राहील.”(CIDCO Appointed)
- अश्विन मुद्गल,
उपाध्यक्ष तथा व्यवस्थापकीय संचालक