एअरफोर्स कर्मचाऱ्याच्या पत्नीवर अत्याचार; नागपुरातील प्रकरणाने उडवली खळबळ!

 

मुंबई : (IAF officer's wife alleges forced religious conversion in Nagpur) भारतीय हवाई दलातील एका अधिकाऱ्याच्या पत्नीवर बलात्कार, तिला ब्लॅकमेल करणे आणि तिचे बळजबरीने धर्मांतर करण्याचा प्रयत्न केल्याचा धक्कादायक प्रकार नागपूरमधून उघडकीस आला आहे. या प्रकरणात पोलिसांनी मुख्य आरोपीसह दोघांना अटक केली असून, कथित धर्मांतरात सहभागी असलेल्या एका मौलवीचा शोध घेण्यासाठी एक पथक मध्य प्रदेशात पाठविण्यात आले आहे. अटक करण्यात आलेल्या आरोपींची नावे अयाज मदारे आणि अमीन शेख अशी आहेत.

 

एफआयआरनुसार, दि. ८ फेब्रुवारी २०२५ रोजी एका हॉटेलमध्ये झालेल्या भेटीदरम्यान अयाजने कथितपणे २४ वर्षीय महिलेच्या पेयामध्ये काहीतरी मिसळले. शुद्धीवर आल्यानंतर आरोपीने तिचे आक्षेपार्ह फोटो आणि व्हिडिओ चित्रित केल्याचे सांगितले. त्यानंतर त्याने हे फोटो आणि व्हिडिओ तिच्या पतीला पाठविण्याची तसेच सोशल मीडियावर व्हायरल करण्याची धमकी देत तिला ब्लॅकमेल केले. पीडितेच्या आरोपानुसार, तिच्यावर अनेक वेळा लैंगिक अत्याचार करण्यात आले आणि तिच्याकडून सुमारे ४ लाख रुपये उकळण्यात आले.

 

या प्रकरणातील एक व्हायरल व्हिडिओ महत्त्वाचा पुरावा ठरत आहे. या व्हिडिओमध्ये २४ वर्षीय महिला रडताना दिसते आहे. त्याचबरोबर अयाज तिचे हात जबरदस्तीने पकडून धार्मिक मंत्र म्हणत तिच्या चेहऱ्यावर वारंवार फुंकर मारताना दिसतो आहे. महिला स्वतःची सुटका करण्याचा प्रयत्न करत असल्याचेही व्हिडिओमध्ये दिसते. तिच्या आरोपानुसार, तिचे धर्मांतर झाले असल्याचे सांगण्यात आले आणि त्यानंतर तिच्यावर बलात्कार करण्याचा प्रयत्न करण्यात आला.

 

 

पोलिसांनी बलात्कार, वारंवार लैंगिक अत्याचार, खंडणी, ब्लॅकमेल, जबरदस्तीने धर्मांतर तसेच अंधश्रद्धा आणि काळी जादूविरोधी कायद्यांतर्गत विविध कलमांखाली गुन्हा दाखल केला आहे. धर्मांतर घडवून आणणाऱ्या मौलवीचा शोध घेण्यासाठी नागपूर पोलिसांचे एक पथक सक्रीय झाले असून पोलीस तपास करत आहेत.

 

 

तक्रारीत नमूद करण्यात आलेल्या आणखी एका घटनेनुसार, ३१ मे रोजी मदारे आणि त्याच्या साथीदाराने महिलेला जबरदस्तीने कळमेश्वर येथे नेले. तेथे तिसऱ्या आरोपीने कथित धार्मिक विधी पार पाडून तिच्याकडून धर्मांतरासाठी "कबूल आहे" असे वदवून घेतले. हा मौलवी मध्य प्रदेशातील छिंदवाडा जिल्ह्यातील तामिया गावचा रहिवासी असल्याचे सांगितले जाते. महिलेचा आरोप आहे की, हे सर्व तिच्या इच्छेविरुद्ध करण्यात आले. विधीनंतर त्या मौलवीने तिने इस्लाम धर्म स्वीकारला असून अयाजसोबत तिचा निकाह झाल्याची घोषणा केली. तसेच तिला जबरदस्तीने मांस खायला घालण्यात आले आणि कलमा पठण करण्यास भाग पाडण्यात आल्याचा आरोप आहे. त्यानंतर आरोपी तिला एका हॉटेलमध्ये घेऊन गेले, जिथे अयाजने पुन्हा तिच्यावर बलात्कार केल्याचा आरोप करण्यात आला आहे.(Nagpur Crime News)