मविआ सरकारच्या काळातील महिला अत्याचारांचा आकडा खूप मोठा; चित्रा वाघ यांनी वाचला पाढा

 

मुंबई : (Chitra Wagh) महाविकास आघाडी सरकारच्या काळात महिलांवरील अत्याचाराचा आकडा खूप मोठा असल्याचे सांगत भाजप आमदार चित्रा वाघ यांनी या घटनांचा पाढाच वाचला.

 

पत्रकार परिषदेत बोलताना आ. चित्रा वाघ (Chitra Wagh) म्हणाल्या की, “महाविकास आघाडी सरकारच्या काळात फेब्रुवारी २०२० मध्ये हिंगणघाटचे जळीत कांड बघितले. या एका महिन्यात ७ ते ८ महिलांना जिवंत जाळल्याच्या घटना घडल्या. सप्टेंबर २०२१ मध्ये साकीनाक्याची अत्याचाराची घटना झाली. डोंबिवली आणि पुण्यात सामुहिक अत्याचाराच्या घटना घडल्या. परभणी, जालना, धाराशीव अशी फार मोठी यादी आहे. एवढेच नाही तर, कोरोनाकाळात कोरोनाचा संसर्ग होऊ नये म्हणून क्वारंटाईन सेंटरमध्ये असलेल्या महिलांचाही विनयभंग झाला. अशा अनेक घटना झाल्या आहेत. त्यावेळी मी तत्कालीन मुख्यमंत्र्यांकडे विशेष अधिवेशन घेण्याची मागणी केली होती. परंतू, माझ्यावरच गुन्हे दाखल करण्यात आले. या सगळ्यात विरोधक राजकारण करतात. महायुती सरकारमध्ये महिला आणि बालकांवरील अत्याचाराच्या बाबतीत कधीही कुणालाही पाठीशी घातले जाणार नाही.”

 

 

त्या पुढे म्हणाल्या की, “महिलांवर होणारे अत्याचार ही संपूर्ण समाजाची वेदना असून यासाठी सरकारच्या वतीने कडक पावले उचलली जात आहेत. आज अत्याचार फक्त रस्त्यावर राहिलेले नसून मोबाईल, सोशल मीडियावर व्हिडीओ व्हायरल करून धमक्या देणे, ऑनलाईन ब्लॅकमेल करणे, असे विविध अत्याचाराचे प्रकार समोर येतात. महिलांसाठी सर्वात सुरक्षित असलेली जागा ही तिचे घर असते. परंतू, आज त्या घरांमधील बातम्या ऐकताना मन सुन्न होते. आज स्वत:च्या राहत्या घरांमध्येही मुली सुरक्षित नाहीत. जन्म देणारा बाप, आजोबा, काका, मामा, भाऊ हेच तिच्यावर अत्याचार करत आहेत. सरकार कायदे करते, सगळ्या उपाययोजना करते पण, आजोबाने आपल्या नातीशी किंवा वडीलांनी आपल्या मुलीशी कसे वागावे हे सांगायला सरकार किंवा कायदा येणार का? ९९ टक्के अत्याचाराच्या घटनांमधील आरोपी हे घराच्या भोवतालचेच रक्ताचे नातेवाईक असतात.”