Japan India Relations : पायाभूत सुविधांसह जपानच्या भारतातील कक्षा विस्तारणार

 

मुंबई : (Japan India relations) अलाहाबाद येथून हिंदी भाषेचे शिक्षण घेतलेल्या व अस्खलित हिंदी बोलणाऱ्या जपानच्या नवनियुक्त वाणिज्यदूत सातो हितोमी यांनी सोमवार, दि. ४ मे रोजी राज्यपाल जिष्णु देव वर्मा यांची लोकभवन मुंबई येथे सदिच्छा भेट घेतली.

 

हितोमी यांनी भारतात दोन वर्षे शिक्षण घेऊन नवी दिल्ली येथील जपानच्या भारतीय दूतावासात एकूण साडे नऊ वर्षे कार्य केले असून हिंदी पाठोपाठ लवकरच मराठी भाषा शिकणार असल्याचे त्यांनी सांगितले. महाराष्ट्र व जपानमध्ये मेट्रो रेल्वे, बुलेट ट्रेन, एक्सप्रेसवे, यांसह विविध पायाभूत सुविधा क्षेत्रामध्ये सहकार्य सुरु असून हे सहकार्य शिक्षण, क्रीडा, संस्कृती व इतर क्षेत्रात देखील वाढविणार असल्याचे त्यांनी सांगितले.(Japan India relations)

 

उभय भाषांची लिपी देवनागरी असल्यामुळे मराठी शिकणे सोपे जाईल असे त्यांनी सांगितले. ओसाका विद्यापीठातील प्राध्यापक अकिरा ताकाहाशी यांनी तब्बल १५०० पानांचा मराठी - जपानी शब्दकोश तयार केला असल्याची माहिती त्यांनी यावेळी बोलताना दिली. पुढील वर्षी भारत व जपान राजनैतिक संबंध प्रस्थापित होण्याला ७५ वर्षे पूर्ण होत असून त्यानिमित्त विविध कार्यक्रमांचे आयोजन केले जाणार असल्याची माहिती हितोमी यांनी राज्यपालांना दिली.(Japan India relations)

 

जपानच्या वाकायामा प्रांताचे महाराष्ट्राशी अगोदरच सहकार्य सुरु असल्याचे सांगून येत्या नोव्हेंबर महिन्यात जपान मुंबईत एका शैक्षणिक परिषदेचे आयोजन करणार असल्याची माहिती त्यांनी यावेळी दिली. कौशल्य क्षेत्रात जपान महाराष्ट्राला सहकार्य करीत असून टोयोटा कंपनी येथील औद्योगिक प्रशिक्षण संस्थांसोबत कार्य करीत असल्याचे त्यांनी सांगितले. जपानला भेट देणाऱ्या भारतीय पर्यटकांची संख्या सातत्याने वाढत असल्याबद्दल हितोमी यांनी आनंद व्यक्त केला. नवनियुक्त जपानी वाणिज्यदूतांचे राज्यात स्वागत करताना राज्यपाल जिष्णु देव वर्मा यांनी त्यांना त्यांच्या कार्यकाळात विद्यापीठ स्तरावर शैक्षणिक सहकार्य वाढविण्याची विनंती केली.(Japan India relations)

 

 

 

जपानी भाषेतील साहित्य, लघुकथा, कविता मराठी भाषेत व मराठी साहित्य जपानी भाषेत भाषांतरित करण्याच्या कार्याला चालना देण्यात यावी असे सांगून अनुवादाचे उत्कृष्ट कार्य करणाऱ्या अनुवादकांना राज्यातील जपानी कंपन्यांच्या सहकार्याने सुवर्ण पदके देण्याची योजना राबवावी अशी सूचना राज्यपालांनी यावेळी केली. जपानी वाणिज्य दूतावासात मराठी भाषेचे वर्ग सुरु केल्यास राज्यातील विद्यापीठातर्फे अध्यापनाची सोय करण्यात येईल असे राज्यपालांनी सांगितले.(Japan India relations)

 

जपानचे पॅनासॉनिक, हिताची, दाईकिन यांसारखे अनेक ग्राहकोपयोगी ब्रॅण्ड्स अनेक वर्षांपासून भारतात असल्यामुळे ते लोकांना भारतीय ब्रँड वाटत असल्याचे राज्यपालांनी सांगितले. गेली तीन वर्षे मुंबईत कार्यरत असलेले जपानचे वाणिज्यदूत असलेले यागी कोजी यांची अन्यत्र बदली झाल्यानंतर सातो हितोमी यांची मुंबई येथे नियुक्ती करण्यात आली आहे. या बैठकीला जपानच्या मुंबईतील कौन्सल शिमादा मेगुमी, राज्यपालांचे सचिव डॉ प्रशांत नारनवरे व सहसचिव एस राममूर्ती हे देखील उपस्थित होते.(Japan India relations)