पालिका इमारतींच्या सुरक्षेसाठी महापालिकेचा मोठा निर्णय; स्ट्रक्चरल कन्सल्टंट्सचे तीन वर्षांचे पॅनेल तयार होणार
Total Views |
मुंबई : (Structural Audit) मुंबई महानगरपालिकेच्या अखत्यारीतील शेकडो जुन्या व मोडकळीस आलेल्या इमारतींच्या सुरक्षेचा प्रश्न आता कायमचा सुटण्याची चिन्हे आहेत. पालिकेच्या मालकीच्या शाळा, रुग्णालये, वसाहती आणि प्रशासकीय कार्यालयांची वेळेत दुरुस्ती, पुनर्विकास तसेच नवीन इमारतींच्या बांधकामावर तांत्रिक देखरेख ठेवण्यासाठी पालिकेने 'स्ट्रक्चरल कन्सल्टंट्स'चे तीन वर्षांचे पॅनेल नियुक्त करण्याचा निर्णय घेतला आहे. यासाठी मुख्य अभियंता (इमारत परिरक्षण) विभागाकडून 'अभिरुची अभिव्यक्ती प्रस्ताव' (ईओआय) मागवण्यात आले आहेत.
मुंबईतील दमट हवामान आणि समुद्राजवळ असलेले भौगोलिक स्थान यामुळे पालिकेच्या जुन्या इमारतींचे 'स्ट्रक्चरल ऑडिट' आणि वेळेत दुरुस्ती करणे अत्यंत आवश्यक असते. या निर्णयामुळे पालिकेला एकाच छताखाली नामांकित तांत्रिक तज्ज्ञांचे पॅनेल उपलब्ध होईल. कन्सल्टंट्स नियुक्त केल्यामुळे प्रत्येक कामासाठी वेगळी निविदा काढण्यात जाणारा वेळेचा अपव्यय टळेल. परिणामी, लालफितीच्या कारभारात न अडकता इमारतींच्या दुरुस्तीची आणि पुनर्विकासाची कामे जलद गतीने आणि पारदर्शक पद्धतीने मार्गी लागतील.
सदर निर्णयाचा महापालिकेच्या जुन्या इमारतींना फायदा होणार आहे. या प्रक्रियेत अद्ययावत तंत्रज्ञान आणि अचूक ऑडिट केले जाणार आहे. या प्रक्रियेत मुंबईबाहेरील राष्ट्रीय व आंतरराष्ट्रीय स्तरावरील नामांकित कंपन्यांनाही संधी देण्यात आली आहे. त्यामुळे जुन्या इमारतींच्या मजबुतीकरणासाठी आधुनिक तंत्रज्ञानाचा वापर करणे शक्य होईल.
या निर्णयामुळे अपघात व जीवितहानी टळणार आहे. पावसाळ्यात किंवा इतर वेळी जुन्या इमारतींचे भाग कोसळण्याच्या दुर्घटना वारंवार घडतात. तज्ज्ञ कन्सल्टंट्सच्या नियमित देखरेखीमुळे अशा इमारतींमधील धोके वेळीच ओळखून तात्काळ दुरुस्ती केली जाईल, ज्यामुळे हजारो कर्मचारी आणि नागरिकांचे आयुष्य सुरक्षित होईल.
जुन्या इमारतींना दीर्घायुष्य लाभणार आहे. दर्जेदार स्ट्रक्चरल दुरुस्तीमुळे जुन्या इमारतींचे आयुष्य आणखी १५ ते २० वर्षांनी वाढू शकते, ज्यामुळे पालिकेचा नवीन बांधकामांवरील कोट्यवधी रुपयांचा खर्च वाचेल.
महानगरपालिकेच्या नियमांनुसार, मुंबईबाहेरील कंपन्यांची निवड झाल्यास त्यांना ३० दिवसांच्या आत एमएमआरडीए क्षेत्रात कार्यालय सुरू करण्याचे हमीपत्र द्यावे लागेल.
या कामाचे कोरे अर्ज फॉर्म्स वरळी येथील मुख्य अभियंता कार्यालयात उपलब्ध असून, अर्ज खरेदीची अंतिम तारीख ९ जून २०२६ आहे. इच्छुकांना आपले प्रस्ताव १२ जून २०२६ रोजी संध्याकाळी ५:०० वाजेपर्यंत वरळी येथील कार्यालयात सादर करावे लागतील.
हे प्रस्ताव १५ जून २०२६ रोजी दुपारी १२:०० वाजता उघडले जातील. मुदतीनंतर आलेले अर्ज बाद ठरवले जातील, असे पालिकेने स्पष्ट केले आहे.(Structural Audit)