महापालिकेच्या ५४७ डिवॉटरिंग पंपांवर इंटरनेट ऑफ थिंग्स आधारित निगराणी व्यवस्था लागू
पाणी साचण्याच्या समस्येवर नियंत्रण मिळविण्यास मदत
Total Views |
मुंबई : (Rainwater Management Mumbai) पावसाळ्यात शहरातील सखल भागांमध्ये होणाऱ्या पाणी साचण्याच्या समस्येवर मात करण्यासाठी मुंबई महानगरपालिकेने आधुनिक तंत्रज्ञानाचा अवलंब केला आहे. शहरभर तैनात असलेल्या ५४७ डिवॉटरिंग पंपांवर आता इंटरनेट ऑफ थिंग्स आधारित मॉनिटरिंग प्रणाली लागू करण्यात आली आहे. या नव्या व्यवस्थेमुळे पंपांच्या कार्यप्रणालीवर रिअल-टाइम निगराणी ठेवणे शक्य होणार आहे.
महापालिका आयुक्त अश्विनी भिडे यांनी सांगितले की, या तंत्रज्ञानाच्या मदतीने पंपांची स्थिती, त्यांचे स्थान, सुरू व बंद होण्याची वेळ, कार्यकालावधी तसेच तांत्रिक माहितीची स्वयंचलित डिजिटल नोंद ठेवता येणार आहे. ही सर्व माहिती केंद्रीकृत डॅशबोर्डवर रिअल-टाइममध्ये उपलब्ध राहणार असून त्यामुळे अधिकाऱ्यांना पंपांवर प्रभावीपणे देखरेख ठेवणे, तांत्रिक बिघाड त्वरित ओळखणे आणि आपत्कालीन परिस्थितीत जलद निर्णय घेणे सुलभ होणार आहे.
महापालिकेच्या माहितीनुसार, मुसळधार पावसाच्या वेळी रस्ते आणि सखल भागांमध्ये साचलेले पाणी जलदगतीने उपसण्यासाठी एकूण ५४७ डिवॉटरिंग पंप कार्यरत ठेवण्यात आले आहेत. यापैकी शहर विभागात १४६, पूर्व उपनगरांमध्ये १७८ आणि पश्चिम उपनगरांमध्ये २२३ पंपांचा समावेश आहे. या पंपांच्या सहाय्याने रस्ते, रेल्वे अंडरपास, महत्त्वाचे चौक आणि पूरग्रस्त भागांतील पाणी उपसून ते नाले, पाइपलाइन किंवा समुद्राकडे वळवले जाते.
हेही वाचा : “नीटमुळे विद्यार्थ्यांचे नाही, तर संजय राऊतांचे मानसिक संतुलन बिघडले” – नवनाथ बन
आयुक्त भिडे यांनी शुक्रवारी आपत्ती व्यवस्थापन विभागात विकसित करण्यात आलेल्या डॅशबोर्डची पाहणी केली. यावेळी अभिजीत बांगर, प्रशांत गायकवाड, रश्मी लोखंडे तसेच इतर अधिकारी उपस्थित होते.
नवीन आयओटी लॉगिंग प्रणालीअंतर्गत प्रत्येक पंपावर विशेष IoT उपकरणे बसविण्यात आली आहेत. या उपकरणांच्या मदतीने पंप किती वेळ कार्यरत होता, किती प्रमाणात पाणी उपसण्यात आले आणि पंपाचा योग्य वापर झाला की नाही, याची डिजिटल नोंद ठेवली जाणार आहे. त्यामुळे कामकाजात अधिक पारदर्शकता येईल आणि मानवी हस्तक्षेपही कमी होईल.(Rainwater Management Mumbai)