बेकायदेशीर कुर्बानीचा वाद पेटला, मिरारारोडमध्ये बकऱ्या ठेवण्यावरुन राडा, मुंबईतील सोसायट्यांकडे भाजपचं लक्ष

मुंबई : (Bakri Eid Mumbai Society) बकरी ईदपूर्वी मिरा रोड परिसरात एका गृहनिर्माण सोसायटीमध्ये बकऱ्या ठेवण्याच्या मुद्द्यावरून तणाव निर्माण झाला असून हा वाद हिंसक वळणावर गेला. त्याचवेळी भाजपने मुंबईतील विविध सोसायट्यांमध्ये होणाऱ्या कथित “बेकायदेशीर कुर्बानी”बाबत चिंता व्यक्त करत प्रशासनावर दबाव वाढवला आहे.

 

 

मिरा रोड येथील पूनम इस्टेट क्लस्टर-1 या सोसायटीत हा वाद सुरू झाला. बकरी ईदसाठी सुमारे 25 बकऱ्या सोसायटीच्या परिसरात आणून तात्पुरत्या शेडमध्ये ठेवण्यात आल्याची माहिती आहे. या प्रकाराला स्थानिकांनी विरोध दर्शवला. सोसायटीची अधिकृत बैठक किंवा सर्व रहिवाशांची संमती न घेता शेड उभारण्यास परवानगी कशी देण्यात आली, असा आक्षेप नोंदवण्यात आला. काही रहिवाशांनी बकऱ्यांमुळे सोसायटीत गैरसोय होत असल्याची तक्रार केली होती. त्यानंतर स्थानिक भाजप नेते, हिंदू संघटनांचे कार्यकर्ते आणि रहिवाशांच्या तक्रारीनंतर काशीमिरा पोलिस आणि महापालिका अधिकाऱ्यांच्या हस्तक्षेपाने हे तात्पुरते शेड हटवण्यात आले. (Bakri Eid Mumbai Society)

 

 

 

 

 

 

 

या मुद्द्यावरुन मुंबईचं राजकारणही तापलेलं आहे. बकरी ईददरम्यान गृहनिर्माण सोसायट्यांमध्ये कथित बेकायदेशीर प्राण्यांची कुर्बानी रोखण्यासाठी भाजप नेत्यांनी कठोर कारवाईची मागणी केली आहे.

 

मुंबईच्या महापौर रीतू तावडे यांनी अनेक भाजप आमदार आणि वरिष्ठ नेत्यांसह मुंबई महापालिका आणि मुंबई पोलिसांना पत्र लिहून सोसायट्यांमधील कुर्बानीसंदर्भात नियमभंगावर कडक नजर ठेवण्याची आणि कारवाई करण्याची मागणी केली आहे.

 

या पत्रावर मिहिर कोटेचा, अतुल भातखळकर, मनीषा चौधरी, पराग शाह आणि संजय उपाध्याय यांच्यासह अनेक भाजप नेत्यांच्या सह्या असल्याची माहिती आहे. (Bakri Eid Mumbai Society)