वाईच्या लघुकुंभ मेळ्याची महती संपूर्ण राज्यात पसरणार - जयकुमार गोरे

 

मुंबई : (Jayakumar Gore) "सातारा वाई नगरीला “दक्षिण काशी” अशी ओळख असून कृष्णा नदीच्या तीरावर वसलेले हे ऐतिहासिक शहर हिंदुत्वाच्या विचारांची परंपरा जपणारे आहे. या पवित्र भूमीत आयोजित करण्यात आलेल्या लघुकुंभमेळ्यामुळे वाई नगरी अधिक पावन झाली आहे." अशी भावना ग्रामविकास मंत्री जयकुमार गोरे यांनी गुरुवार दि.२१ रोजी व्यक्त केली.

 

वाईच्या कुंभ मेळ्याची महती संपूर्ण राज्यात पसरणार असल्याचे उद्गार मंत्री जयकुमार गोरे यांनी वाईच्या लघुकुंभ मेळ्याच्या उद्घाटन प्रसंगी बोलताना काढले.

 

यावेळी गुजरातहून आलेले परमपूज्य महंत महादेवगिरी महाराज, योगेन्द्र्गिरी महाराज, नगराध्यक्ष अनिल सावंत, माजी जिल्हा परिषद अध्यक्षा अरुणादेवी पिसाळ, विराज शिंदे ,पंचायत समिती सदस्य स्वप्निल गायकवाड , उपनगराध्यक्ष घनशाम चक्के, विरोधी पक्ष नेते विजय ढेकाणे, प्रदेश उपाध्यक्ष सचिन घाटगे, मंदीर महासंघ तालुकाध्यक्ष श्रीधर भाडळकर, राजेंद्र पुजारी, कृष्णा नदी सेवा समितीचे सदस्य काशिनाथ शेलार, सचिन सावंत, निलेश मोरे, प्रवीण जाधव निखिल जाधव संतोष जमदाडे,संग्राम पाडळे ,सर्व नगरसेवक, नगरसेविका, वाईकर नागरिक, सर्व साधुसंत, भाविक मोठ्या संख्येने उपस्थित होते.

 

ग्रामविकास मंत्री गोरे म्हणाले की, "गेल्या अनेक दिवसांपासून या कुंभमेळ्याच्या आयोजनासाठी आयोजक, साधूसंत, नगराध्यक्ष अनिल सावंत, नगरसेवक, नगरसेविका तसेच सर्व कार्यकर्ते प्रचंड मेहनत घेत आहेत. त्यांच्या या परिश्रमामुळे हा सोहळा यशस्वी होत आहे."

 

 

 

या प्रसंगी गुजरात अटल धामचे महंत महादेवगिरीजी महाराज म्हणाले," अशा धार्मिक आणि सांस्कृतिक उपक्रमांमुळे समाजात एकात्मता वाढते व हिंदुत्ववादी विचारांना बळ मिळते."

 

यावेळी मुख्य आखाड्याच्या वतीने मंत्री जयकुमार गोरे व नगराध्यक्ष अनिल सावंत यांचे स्वागत करण्यात आले. वाईच्या वतीने नगराध्यक्ष अनिल सावंत व त्यांच्या सहकाऱ्यांनी येणाऱ्या सर्व साधुसंतांचे स्वागत केले.

 

कार्यक्रमाच्या सुरुवातीला फीत कापून व शंकराच्या व महागणपती च्या प्रतिमांचे पूजन करून लघुकुंभ मेळ्याचा शुभारंभ करण्यात आला. सकाळी ११ वाजेपासून संताच्या दर्शनासाठी गर्दी केली होती. तसेच आज पहिल्या दिवशी दीडशे साधूंनी उपस्थिती दर्शविली.(Jayakumar Gore)