नीट पेपरफुटीचा मास्टरमाईंड शिवराज मोटेगावकर, पेपर फोडण्यासाठी पॅनेलमध्ये पेरली माणसं, स्मरणशक्तीच्या आधारे प्रश्न बाहेर

मुंबई : (NEET Paper Leak Mastermind) नीट पेपरफुटी प्रकरणात लातूरच्या शिवराज मोटेगावकरला अटक केल्यानंतर, त्याच्या मालकीचे असलेले राज्यभरातील आरसीसी क्लासेस अडचणीत आलेले आहेत. पुण्यातील आरसीसी क्लासेसला महापालिकेनं सील ठोकलेले आहे. दिल्लीतील राष्ट्रीय परीक्षा संस्था म्हणजेच एनटीएच्या मुख्य कार्यालयातूनच या पेपरफुटीचे प्रश्न बाहेर आले असण्याची शक्यता आता वर्तवण्यात येते आहे. नीटने पश्नपत्रिका तयार करण्यासाठी नेमलेल्या अनुभवी प्राध्यापकांनीच हे प्रश्न बाहेर पाठवले असल्याचा संशय व्यक्त होतो आहे. या सगळ्या पेपरफुटीचा सूत्रधार शिवराज मोटेगावकर असल्याचे सांगण्यात येते आहे. (NEET Paper Leak Mastermind)

आरसीसी क्लासेसचा मालक असलेला शिवराज मोटेगावकर याने हे सगळं षडयंत्र घडवून आणल्याचा प्राथमिक संशय तपास यंत्रणांना आहे. पेपरफुटी घडवून आणण्यासाठी सुनियोजित प्रयत्न मोटेगावकरनं केल्याचं तपासात समोर येते आहे. मोटेगावकरच्या क्लासमध्ये यापूर्वी शिकवणारे पी व्ही कुलकर्णी आणि मनीषा मांढरे या दोन प्राध्यापकांना एनटीएच्या प्रश्नपत्रिका सेट करणाऱ्या पॅनलवर बसवण्यासाठी मोटेगावकरनं प्रयत्न केले आणि ते यशस्वीही ठरले.वर्षानुवर्षे विषय शिकवणाऱ्या कुलकर्णी आणि मांढरे यांना प्रश्न तोंडपाठ होते. (NEET Paper Leak Mastermind)