भोजशाळेत भक्तांचा जल्लोष!; न्यायालयाच्या निर्णयानंतर माता वाग्देवीला नमन करत हिंदूंकडून परिसरात पूजा-अर्चा
17-May-2026
Total Views |
_202605171220369013_H@@IGHT_350_W@@IDTH_696.jpg "BHOJSHALA")
मुंबई : (Bhojshala) मध्य प्रदेश उच्च न्यायालयाच्या निर्णयानंतर लगेच दुसऱ्या दिवशी शनिवारी सकाळी भोजशाळा परिसरात भाविक आणि भोज उत्सव समितीचे पदाधिकारी मोठ्या संख्येने दाखल झाले. त्यांनी माता वाग्देवीला नमन करत परिसरात पूजा-अर्चा केली, हनुमान चालीसाचे पठण केले तसेच यज्ञकुंडाजवळ पुष्पांजली अर्पण केली. अनेक वर्षांनंतर कोणत्याही अडथळ्याशिवाय दर्शन आणि पूजा करण्याची संधी मिळाल्याची भावना भाविकांनी व्यक्त केली. धार शहरात कडक सुरक्षा व्यवस्था ठेवण्यात आली होती आणि संपूर्ण वातावरण शांततापूर्ण राहिले.
भोजशाळा मुक्ती यज्ञ समितीचे संयोजक गोपाल शर्मा म्हणाले, “भोजशाळेचा प्रत्येक कण सांगतो की हे मंदिर आहे. हे मंदिर होते, आहे आणि कायम राहील.” या प्रसंगी मोठ्या संख्येने भाविक, सामाजिक संघटनांचे पदाधिकारी तसेच भोजशाळा मुक्ती आंदोलनाशी संबंधित कार्यकर्तेही उपस्थित होते. सर्वांनी माता वाग्देवीच्या स्थानावर श्रद्धेने पूजा-अर्चना केली, फुले अर्पण केली आणि भक्तिभावाने आपली आस्था व्यक्त केली.
हेही वाचा : मानखुर्द येथील ११ एकर शासकीय जमीनीवर उभारणार कारागृह
शनिवारी सकाळपासूनच परिसराच्या बाहेर भाविकांची गर्दी सुरू झाली होती. प्रशासनाकडून व्यापक सुरक्षा व्यवस्था करण्यात आली होती आणि संपूर्ण परिसरात शांततेचे वातावरण होते. भाविकांनी यज्ञकुंडाजवळ पुष्प अर्पण करून दंडवत प्रणाम केला आणि माता वाग्देवीचे आशीर्वाद घेतले. अनेकांनी या निर्णयाला अनेक वर्षांच्या संघर्षाचा आणि श्रद्धेचा विजय असल्याचे म्हटले.(Bhojshala)
उल्लेखनीय म्हणजे, शुक्रवारी मध्य प्रदेश हायकोर्टाच्या इंदूर खंडपीठाने भोजशाळा प्रकरणात निकाल देताना या परिसराला राजा भोज यांच्या काळातील वाग्देवी मंदिर मान्य केले. न्यायालयाने हिंदू पक्षाला येथे पूजा-अर्चनेचा अधिकार देण्याबाबत महत्त्वपूर्ण टिप्पणीही केली. या निर्णयानंतर शनिवारी हिंदू समाज मोठ्या उत्साहाने भोजशाळेत दाखल झाला.
मध्य प्रदेश हायकोर्टाच्या इंदूर खंडपीठाने १५ मे रोजी धार येथील वादग्रस्त भोजशाळा-कमाल मौला परिसराला देवी वाग्देवीचे (सरस्वती) प्राचीन मंदिर घोषित केले. या ऐतिहासिक निर्णयात न्यायालयाने ७ एप्रिल २००३ च्या भारतीय पुरातत्व विभागाच्या आदेशाला अंशतः रद्द केले. या आदेशानुसार मुस्लिम पक्षाला शुक्रवारी नमाज पठणाची परवानगी देण्यात आली होती. आता हिंदू पक्षाला येथे पूजा-अर्चनेचा अधिकार मिळाला आहे.(Bhojshala)
ओंकार मुळ्ये
'मास मीडिया' या विषयातून पदवीपर्यंतचे शिक्षण पूर्ण.'कम्युनिकेशन ॲण्ड जर्नालिझम' विषयातून पदव्युत्तरपर्यंतचे शिक्षण पूर्ण. सध्या दै.'मुंबई तरुण भारत'मध्ये वेब उपसंपादक म्हणून कार्यरत. लिखाण, संगीत, वाचन, फोटोग्राफी, इ.ची आवड.लिवोग्राफी भाषाशैलीत विशेष प्रावीण्य.बालपणापासून रा.स्व.संघाचा स्वयंसेवक