साहित्य संस्था लोकाभिमुख असणे आवश्यक : डॉ. धनश्री साने

 

 

‘महाराष्ट्र साहित्य परिषद’ डोंबिवली शाखेच्या अध्यक्षपदी निवड होणं, ही माझ्यासाठी अत्यंत अभिमानाची आणि त्याचबरोबर जबाबदारीचीसुद्धा गोष्ट आहे. ‘महाराष्ट्र साहित्य परिषद’ ही साहित्य, संस्कृती, समाजकारण या गोष्टींमध्ये समन्वय साधणारी, तसेच अनेक लेखकांना घडवणारी संस्था आहे. सर्व सदस्यांनी आमच्यावर दाखवलेल्या विश्वासामुळे आमच्या कार्यकारिणीची बिनविरोध निवड झाली. त्यामुळे मी सर्वांची ऋणी आहे.

 

 

एक साहित्यप्रेमी म्हणून ‘मसाप’शी माझा संबंध अत्यंत जुना आहे. १९९७ पासून मी परिषदेची सभासद आहे. डोंबिवली शाखेच्या माध्यमातून साहित्यासाठी विविध उपक्रम आणि कार्यक्रमाचे आयोजन आम्ही करत असू. यामुळे या संस्थेबरोबरच इथल्या माणसांसोबत माझे नाते अधिकच दृढ झाले. ‘मसाप’ही केवळ संस्था नसून संस्कृती जपणारे व्यासपीठ आहे. माझ्या पिढीतील अनेकांच्या वैचारिक जडणघडणीमध्ये या संस्थेचा मोठा वाटा आहे.

 

 

पारंपरिक कार्यक्रमांसोबत युवा पिढीला आकर्षित करतील, असे वेगवेगळे उपक्रम आम्ही हाती घेणार आहोत. साहित्यसंबंधी विविध कार्यशाळांचे आयोजन करणे, डिजिटल साहित्य मंच, शाळा-महाविद्यालयांतील वाचनसंस्कृती, ग्रामीण भागातील साहित्यिकांपर्यंत पोहोचणे, अशा अनेक लोकाभिमुख आणि वाचकाभिमुख, तसेच सर्व समावेशक कार्यक्रमांची आखणी आम्ही करणार आहोत. आमच्या नव्या कार्यकारिणीच्या सहकार्याने निश्चितच हे उपक्रम यशस्वी करू.

 

 

कोणत्याही संस्थेमधून निवडणुका झाल्यानंतर विविध चर्चा होणे स्वाभाविक असते. हा लोकशाही प्रक्रियेचा भाग आहे. ‘मसाप’ ही साहित्य संस्कृतीला वाहिलेली संस्था आहे. तिचे केंद्र साहित्यच राहिले पाहिजे, यात काही दुमत नाही. जिथे काही प्रमाणात मतभेद राहिले असतील, ते सामोपचाराने सोडवता येतील. संवादाच्या माध्यमातून समस्यांवर तोडगा काढता येईल. सगळ्यांना सोबत घेऊन एक सकारात्मक विचार घेऊन आपल्याला पुढे जायचे आहे, हे नक्की.

 

 

१००वे अखिल भारतीय मराठी साहित्य संमेलन ही मराठी साहित्य विश्वातील एक ऐतिहासिक घटना आहे. या संमेलनात वेगवेगळ्या साहित्यिक संस्था आणि वाचक विविध उपक्रमांच्या माध्यमातून जोडले जाणार आहेत. यासाठी डोंबिवली शाखा, पुणे येथील ‘महाराष्ट्र साहित्य परिषदे’चे अध्यक्ष योगेश सोमण यांच्या मार्गदर्शनाखाली कार्यरत राहील. १००व्या संमेलनाआधी ९९ ठिकाणी विविध संमेलने पार पडणार आहेत. त्यामध्येसुद्धा डोंबिवली शाखा सक्रिय असेल. बालवाचकांना किंवा युवा वर्गाला आकर्षित करणारे असे संमेलन डोंबिवलीत करण्याचा आमचा मानस आहे.