मुख्यमंत्री देवेंद्र फडणवीस आणि केंद्रीय मंत्री शिवराजसिंह चौहान यांच्या उपस्थितीत उद्या साताऱ्यात ५ लाख घरांचे लोकार्पण

 

 मुंबई : (Satara Housing Project Inauguration) प्रधानमंत्री आवास योजनेंतर्गत केंद्र शासनाने महाराष्ट्रासाठी मंजूर केलेल्या ३० लाख घरांपैकी ५ लाख घरे पूर्ण झाली असून, या घरांचे लोकार्पण तसेच योजनेसाठी १० हजार कोटी निधी वितरणाचा भव्य कार्यक्रम शुक्रवार दि. १५ रोजी सातारा येथे आयोजित करण्यात आला आहे. राज्याचे लोकप्रिय मुख्यमंत्री देवेंद्र फडणवीस तसेच केंद्रीय ग्रामीण विकास मंत्री शिवराजसिंह चौहान यांच्या प्रमुख उपस्थितीत हा कार्यक्रम संपन्न होणार आहे.

 

या कार्यक्रमाच्या पार्श्वभूमीवर राज्याचे ग्रामविकास व पंचायतराज मंत्री जयकुमार गोरे (भाऊ) यांनी गुरुवार दि.१४ रोजी सातारा येथे कार्यक्रम स्थळाची पाहणी करून तयारीचा सविस्तर आढावा घेतला. विविध यंत्रणांशी समन्वय साधत लाभार्थी, नागरिक आणि मान्यवरांच्या सोयी-सुविधांबाबत संबंधित अधिकाऱ्यांकडून माहिती घेतली. सुरक्षा व्यवस्था, वाहतूक नियोजन तसेच इतर आवश्यक बाबींवरही त्यांनी विशेष लक्ष केंद्रित केले. (Satara Housing Project Inauguration)

 

उन्हाची तीव्रता लक्षात घेता कार्यक्रमस्थळी पिण्याच्या पाण्याची पुरेशी व्यवस्था, सावलीसाठी मंडप, वैद्यकीय सुविधा तसेच नागरिकांची कोणतीही गैरसोय होऊ नये यासाठी आवश्यक उपाययोजना करण्याच्या सूचना मंत्री जयकुमार गोरे यांनी संबंधित अधिकाऱ्यांना दिल्या.

 

 

यावेळी सातारा जिल्हा परिषदेच्या अध्यक्षा प्रियाताई महेश शिंदे, उपाध्यक्ष राजू भैय्या भोसले, जिल्हा परिषद मुख्य कार्यकारी अधिकारी याशनी नागराजन, समाज कल्याण समितीचे सभापती ऋषीकेश धायगुडे-पाटील, भाजप सातारा लोकसभा संयोजक सुनील तात्या काटकर, भाजप सातारा जिल्हा निवडणूक प्रमुख धैर्यशील दादा कदम, जिल्हा परिषद सदस्य धनाजी काका पाटील, भाजप सातारा जिल्हा महिला मोर्चाच्या माजी अध्यक्षा सुरभीताई भोसले, सरचिटणीस विठ्ठल बलशेठवार, सातारा शहराध्यक्ष विकास गोसावी, जिल्हा संवादक प्रवीण शहाणे, भाजपा किसान मोर्चा प्रदेश सरचिटणीस संदीप गिड्डे-पाटील यांच्यासह विविध मान्यवर, जिल्हा परिषद सदस्य व संबंधित अधिकारी उपस्थित होते. (Satara Housing Project Inauguration)