केरळींचे ‘कडक पुरथ’ कुणाला?

केरळम्मध्ये ५४.७३ टक्के हिंदू, २६.५६ टक्के मुस्लीम आणि १८.३८ टक्के ख्रिस्ती लोकसंख्या आहे. हिंदूंमध्ये इळवा समाज सर्वाधिक असून, हा समाज मुख्यत्वे सीपीएमकडे झुकलेला मानला जातो. २०१६ मध्ये भाजपने तुषार वेलापल्ली यांच्या ‘भारथ धर्म जन सेना’ला ‘एनडीए’मध्ये सामील करून घेतले. तुषार वेल्लापल्ली यांचे वडील वेलपल्ली नटेसन हे इळवा समाजातील प्रभावशाली नेते मानले जातात. इळवा समाजानंतर नायर समाजाचे प्रमाण मोठे असून, हा समाज काँग्रेसची व्होटबँक मानला जातो. केंद्रीय मंत्री राजीव चंद्रशेखर हे स्वतः नायर समाजाचे आहेत. त्यामुळे हिंदू मतांचे केंद्रीकरण करण्याकडे ‘एनडीए’ विशेष लक्ष देत आहे. शिवाय, ख्रिस्ती चर्चशी संवाद आणि ‘minority imbalance’ या मुद्द्यावर भाजपचा भर आहे. ‘लॅण्ड रिफॉर्म’मुळे केरळम्मधील जमीनदार असलेला नायर समाज व ख्रिस्ती मिशनरी डाव्यांवर विशेष नाराज आहेत. त्यामुळे ख्रिस्ती व नायर दोघेही ‘यूडीएफ’चे पारंपरिक मतदार झाले. मात्र, मागील काही काळापासून ‘एनडीए’ या दोन्ही समूहांना आपल्याकडे आकर्षित करण्याच्या प्रयत्नात आहे, तर केरळम् काँग्रेसमधील काही गटांशी युती करून ‘एलडीएफ’ ख्रिस्ती मतांना आपल्याकडे वळवण्याचा प्रयत्न करताना दिसते.

मतदारांमध्ये सत्ताधारी ‘एलडीएफ’बद्दल काही प्रमाणात नाराजी नक्कीच आहे. बेरोजगारी आणि स्थलांतर हे नाराजीचे प्रमुख मुद्दे. ‘यूडीएफ’ आणि ‘एलडीएफ’ समर्थक उघडपणे आपण कोणाला मतदान करणार आहोत, याबद्दल बोलतात. मात्र, ‘एनडीए’चा मतदार त्याबद्दल चटकन बोलत नाही. म्हणूनच इथे ’silent voting’ हा घटक लक्षवेधी ठरताना दिसतो. लोकसभेचे विरोधी पक्षनेते राहुल गांधींबद्दल प्रश्न विचारला असता, "राहुल गांधींना आम्ही डोळे झाकून निवडून देतो. पण, ते या निवडणुकीत इकडे फिरकले नाहीत,” अशी खंत ‘यूडीएफ’च्या काही मतदारांनी व्यक्त केली. केरळम्मधील वायनाडच्या खासदार प्रियंका गांधींच्या इंग्रजी भाषणावरूनही काहींनी नाराजी व्यक्त केली. "आम्ही त्यांना निवडून देतो, त्यांना मल्याळम् यायला हवे,” अशी प्रतिक्रिया काहींनी दिली. पंतप्रधान नरेंद्र मोदींबद्दल विचारले असता, "केंद्रात मोदी; पण राज्यात एलडीएफ,” असेही मत काहींनी व्यक्त केले. ‘शबरीमाला’ प्रकरण आणि ‘सुवर्ण घोटाळ्या’बद्दल ‘एलडीएफ’वर काही मतदार नाराज आहेत.