Donald Trump: "...तर सर्व काही उडवून देऊ", ट्रम्प यांचा धमकीवजा इशारा; इराणकडूनही चोख प्रत्युत्तर देण्याची धमकी

अमेरिकेचे राष्ट्राध्यक्ष डोनाल्ड ट्रम्प यांनी इराणला धमकी देत थेट शिवीगाळ केली आहे. त्यांनी तेहरानमधील वीज प्रकल्प आणि पुलांवर समन्वित हल्ले करण्याचा उघड इशारा दिला. या धमकीसोबतच ट्रम्प यांनी वापरलेल्या भाषेने सर्वांचे लक्ष वेधून घेतले आहे. पुढे ट्रम्प म्हणाले की, "मंगळवारी पॉवर प्लांट डे आणि ब्रिज डे ठरेल. यापेक्षा दुसरं काहीही नसेल. होर्मुझची सामुद्रधुनी खुली करा, अथवा तुम्ही नरकात जाल. तुम्ही पाहतच बसा", असा इशारा देत डोनाल्ड ट्रम्प यांनी इराणमधील ऊर्जा प्रकल्प आणि पायाभूत सुविधांना अमेरिका लक्ष्य करणार असल्याचे सूचित केले. (Donald Trump)

 

यावर प्रत्युत्तर देताना इराणनेही कठोर भूमिका घेतली आहे. इराणच्या परराष्ट्र मंत्रालयाचे प्रवक्ते इस्माईल बगाई यांनी स्पष्ट इशारा दिला की, अमेरिकेकडून किंवा त्यांच्या सहयोगींकडून कोणताही हल्ला झाल्यास इराण तितक्याच ताकदीने प्रत्युत्तर देईल. सध्याच्या घडीला इराणी सैन्य कोणत्याही परिस्थितीसाठी पूर्णपणे सज्ज असल्याचेही त्यांनी नमूद केले. दरम्यान, इराणचे सांस्कृतिक मंत्री सईद रझा सालिह-अमिरी यांनी ट्रम्प यांची धमकी फेटाळून लावली आहे. ट्रम्प हे 'अस्थिर, भ्रमावस्थेतील व्यक्ती असल्याची टीका त्यांनी केली. (Donald Trump)