अग्नी रक्षकच निघाले बिबट्याचे भक्षक; बोरिवली नॅशनल पार्कमधील बिबट शिकारीमध्ये सहभाग

 

 

 

मुंबई (विशेष प्रतिनिधी) - वन वणव्याच्या नियंत्रणासाठी येऊर वन विभागात अग्नी रक्षक म्हणून काम केलेले दोन इसम बोरिवलीच्या राष्ट्रीय उद्यानातील बिबट शिकार प्रकरणामध्ये सहभागी असल्याची माहिती समोर आली आहे (sgnp leopard poaching). डहाणू वन विभागाने बिबट्याच्या कातडीच्या तस्करीवरुन राष्ट्रीय उद्यानात बिबट्याची शिकार झाल्याचे प्रकरण उघडकीस आणले होते (sgnp leopard poaching). या प्रकरणामध्ये आजवर सहा आरोपींना ताब्यात घेण्यात आले असून त्यामधील दोन आरोपी हे येऊर वनविभागात अग्नी रक्षक म्हणून काम करत होते (sgnp leopard poaching). त्यामुळे वणव्यापासून जंगलाचे रक्षण करणारे अग्नी रक्षकच बिबट्याचे भक्षक असल्याचे उघड झाले आहे. (sgnp leopard poaching)

 

 

राष्ट्रीय उद्यानातील एल-३० या नर बिबट्याची शिकार करुन त्याच्या कातडीची तस्करी करणाऱ्यांच्या मुसक्या डहाणू वन विभागाने आवळल्या होत्या. या प्रकरणात आजवर सहा आरोपींना अटक करण्यात आली असून ते मिरा-भाईंदर येथील काशीगावचे रहिवासी आहेत. यातील दोन आरोपी हे येऊर वन विभागात अग्नी रक्षक म्हणून काम करत असल्याची माहिती चौकशीदरम्यान समोर आली आहे. उन्हाळ्यातील वन वणव्याच्या हंगामात वन विभागात अग्नी रक्षकांची रोजंदारी स्वरुपात नेमणूक केली जाते. हे अग्नी रक्षक जाळपट्ट्यांची डागडुजी, वन वणवा नियंत्रण अशा स्वरुपाची कामे वनकर्मचाऱ्यांसोबत करतात. अटक केलेल्या आरोपींमधील दोन आरोपी देखील बिबट्याची शिकार झालेल्या जंगलात अग्नी रक्षक म्हणून काम करत होते. त्यामुळे त्यांनी इथला परिसर आणि तिथल्या बिबट्याची हालचाल हेरुन ठेवली होती.

 

 

चौकशीदरम्यान बिबट्याची शिकार २१ डिसेंबर रोजी झाल्याची माहिती समोर आली आहे. मोबाईलवरील काही छायाचित्रांवरुन ही माहिती उघड झाली आहे. मात्र, आम्ही हा बिबट्या मारला नसून तो कोणीतरी लावलेल्या तारेच्या हासकीत अडकून त्याचा मृत्यू झाल्याचे आरोपींचे म्हणणे आहे. मृत बिबट्या दिसल्याने पैशाच्या हव्यासापोटी आम्ही केवळ त्याची कातडी काढल्याचे, आरोपी म्हणत आहेत. मात्र, यामधील सतत्या पडताळण्यासाठी भाताणे वनपरिक्षेत्राचे वनकर्मचारी सखोल चौकशी करत आहेत. तसेच मुख्य आरोपी विशाल वरठा याला अटक केल्यानंतर भितीपोटी माझ्यापाशी असलेले बिबट्याचे दात आणि नखं घोडबंदरच्या खाडीत फेकून दिल्याचे एका आरोपीने सांगितले. त्याची देखील चौकशी करण्यात येत आहे.