CM Devendra Fadnavis flyover inauguration : पुणेकरांची वाहतूक कोडींपासून सुटका; मुख्यमंत्री फडणवीसांच्या हस्ते डबल डेकर उड्डाणपुलाचे लोकार्पण
08-Mar-2026
Total Views |
_202603081918494508_H@@IGHT_350_W@@IDTH_696.jpg "CM Devendra Fadnavis flyover inauguration")
पुणे : (CM Devendra Fadnavis flyover inauguration) सावित्रीबाई फुले पुणे विद्यापीठासमोरील बहुप्रतीक्षित एकात्मिक दुमजली उड्डाणपूल रविवारी मुख्यमंत्री देवेंद्र फडणवीस यांच्या हस्ते दूरदृश्य प्रणालीद्वारे लोकार्पित करण्यात आला. या पुलामुळे विद्यापीठ चौक परिसरातील वाहतूक कोंडी मोठ्या प्रमाणात कमी होऊन शहरातील प्रवास अधिक सुरळीत होण्यास मदत होणार असल्याची अपेक्षा व्यक्त करण्यात येत आहे.
मान्यवरांच्या उपस्थितीत लोकार्पण
उद्घाटन कार्यक्रमास उपमुख्यमंत्री तथा पुणे जिल्ह्याच्या पालकमंत्री सुनेत्रा अजित पवार, केंद्रीय नागरी विमान वाहतूक राज्यमंत्री मुरलीधर मोहोळ, राज्यमंत्री माधुरी मिसाळ, महापौर मंजुषा नागपुरे, आमदार सिद्धार्थ शिरोळे, पीएमआरडीएचे आयुक्त डॉ. योगेश म्हसे, पुणे महानगरपालिकेचे अतिरिक्त आयुक्त पृथ्वीराज बी. पी., तसेच विविध शासकीय अधिकारी आणि लोकप्रतिनिधी उपस्थित होते.
मुख्यमंत्री देवेंद्र फडणवीस म्हणाले, पुण्यासारख्या वेगाने विकसित होणाऱ्या शहरासाठी सक्षम पायाभूत सुविधा अत्यावश्यक आहेत. शहरातील वाहतूक कोंडी कमी करण्यासाठी शासनाकडून बहुआयामी उपाययोजना राबविल्या जात आहेत. विद्यापीठ चौकातील जुना पूल पाडून आधुनिक दुमजली उड्डाणपूल उभारण्याचा निर्णय घेताना अनेक अडचणी आणि मतभेद होते; मात्र सर्वांना विश्वासात घेऊन हा प्रकल्प यशस्वीरीत्या पूर्ण करण्यात आला.
अजित पवार यांच्या नावाची मागणी
उद्घाटन प्रसंगी केंद्रीय राज्यमंत्री मुरलीधर मोहोळ यांनी या पुलाला माजी उपमुख्यमंत्री अजित पवार यांचे नाव देण्याची मागणी केली. त्यांनी नमूद केले की, या प्रकल्पाची संकल्पना मांडण्यापासून ते प्रत्यक्ष उभारणीपर्यंत अजित पवार यांनी सातत्याने पाठपुरावा केला.
मुख्यमंत्री देवेंद्र फडणवीस यांनी सांगितले, “अजित दादांनी हा पूल उभारण्यासाठी मोठा पुढाकार घेतला. जुना पूल पाडून आधुनिक दुमजली पुल उभारण्याचा धाडसी निर्णय त्यांनी घेतला. हा पूल अभियांत्रिकी कौशल्याचा उत्तम नमुना असून आधुनिक शहराच्या गरजांना अनुरूप आहे.” यावरून पुलाला अजित पवार यांचे नाव देण्याबाबत सकारात्मक निर्णय घेण्याची शक्यता आहे.
वाहतूक कोंडीवर कायमस्वरूपी उपाय
गेल्या काही वर्षांपासून विद्यापीठ चौक परिसरात वाहतूक कोंडी मोठ्या प्रमाणात होत होती. या समस्येवर दीर्घकालीन उपाय म्हणून आधुनिक तंत्रज्ञानाचा वापर करून हा एकात्मिक दुमजली उड्डाणपूल उभारण्यात आला आहे. पुलाच्या वरच्या स्तरावर मेट्रो मार्ग असून खालच्या स्तरावर वाहनांसाठी उड्डाणपूल तयार करण्यात आले आहे. त्यामुळे चौकातील सिग्नलवरील ताण कमी होऊन वाहतुकीचा वेग वाढण्यास मदत होणार आहे. औंध, बाणेर, पाषाण आणि शिवाजीनगर या भागांतील नागरिकांना या पुलामुळे मोठा दिलासा मिळणार आहे.
२७७ कोटींचा महत्त्वाकांक्षी प्रकल्प
पीएमआरडीएच्या माध्यमातून सुमारे २७७ कोटी रुपये खर्च करून १,७६३ मीटर लांबीचा हा उड्डाणपूल उभारण्यात आला आहे. औंध, बाणेर, पाषाण आणि शिवाजीनगर या भागांकडे जाणाऱ्या वाहनांसाठी स्वतंत्र रॅम्प आणि जोडरस्ते तयार करण्यात आले आहेत. भविष्यात या मार्गावर मेट्रो सेवा सुरू झाल्यानंतर वाहतूक व्यवस्थेत आणखी सुधारणा होणार आहे.
पुणेकरांच्या प्रवासाला नवी गती
या एकात्मिक दुमजली उड्डाणपुलामुळे विद्यापीठ रस्ता, बाणेर आणि पाषाण परिसरातील वाहतूक कोंडी कमी होण्यास मदत होणार आहे. मेट्रो मार्गिकेचा समावेश असल्याने भविष्यात प्रवास अधिक जलद आणि सोयीस्कर होईल. परिणामी, पुणेकरांचा प्रवासाचा वेळ वाचणार असून शहराच्या वाहतूक व्यवस्थेला नवी गती मिळणार आहे.
दिनेश दानवे
डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर येथून पदवी आणि मराठवाडा मित्र मंडळाचे वाणिज्य महाविद्यालय, पुणे येथून पत्रकारिता अभ्यासक्रमात पदव्युत्तर शिक्षण पूर्ण केले आहे. डिजिटल आणि सोशल मीडिया हाताळण्याचा अनुभव असून राजकारण, मनोरंजन आणि शेती या विषयांमध्ये विशेष रस आहे. प्रिंट आणि डिजिटल माध्यमांमध्ये इंटर्नशिपचा अनुभव घेतला असून सध्या दै. मुंबई तरुण भारत मध्ये वेब उपसंपादक म्हणून कार्यरत आहेत.