Iran women rights : इराणमध्ये ऐतिहासिक क्रांती: महिलांना मिळाले मोटारसायकल चालवण्याचे कायदेशीर अधिकार
05-Feb-2026
Total Views |
_202602051511034053_H@@IGHT_350_W@@IDTH_696.jpg "iran woman rights")
मुंबई : (Iran women rights) इराणमध्ये महिलांसाठी एक मोठा सकारात्मक निर्णय घेण्यात आला आहे. सरकारने महिलांना कायदेशीररित्या मोटारसायकल चालवण्याचा परवाना देण्याचा निर्णय जाहीर केला आहे. हा निर्णय ४ फेब्रुवारी २०२६ रोजी लागू झाला आणि त्याने देशातील महिलांमध्ये आनंदाचे वातावरण निर्माण केले आहे.
जानेवारीच्या अखेरीस इराणच्या संसदेत ठराव मंजूर
इराणच्या उपराष्ट्रपती रेजा आरिफ यांनी ३ फेब्रुवारी रोजी या ठरावावर स्वाक्षरी केली होती, आणि त्यानंतर मंत्रिमंडळानेही या निर्णयाला मान्यता दिली. ठरावानुसार, महिला पोलिसांच्या देखरेखीखाली मोटारसायकल चालवण्याचे प्रशिक्षण घेतील आणि परीक्षा उत्तीर्ण झालेल्या महिलांना अधिकृत ड्रायव्हिंग लायसन्स मिळेल.
यापूर्वी महिलांना मोटारसायकल किंवा स्कूटर चालवण्यास मनाई नव्हती, पण अधिकृत परवाना नसल्यामुळे अपघात झाल्यास त्यांना दोषी ठरवले जायचे. अनेक महिलांना या अडचणींमुळे गैरसोय भोगावी लागत होती, परंतु या नव्या निर्णयामुळे त्या समस्या दूर होणार आहेत आणि महिलांना सुरक्षित आणि कायदेशीर मार्गाने वाहतूक करता येणार आहे.
विशेष म्हणजे हा निर्णय गेल्या महिन्यातील हिंसक निदर्शनांच्या पार्श्वभूमीवर घेतला गेला आहे. सुरुवातीला महागाई आणि आर्थिक संकटामुळे सुरू झालेल्या निदर्शनांनी नंतर सरकारच्या भ्रष्टाचाराविरोधात रूप घेतले. मीडिया रिपोर्टनुसार, या कारवाईत ३००० हून अधिक लोकांचा मृत्यू झाला. या निदर्शनांमध्ये महिलांचा मोठा सहभाग होता, ज्यामुळे त्यांच्या हक्कांसाठी जागतिक लक्ष वेधले गेले.
तज्ज्ञांचा असा विश्वास आहे की, हा निर्णय महिलांच्या हक्कांसाठी मोठा टप्पा ठरेल. यामुळे समाजात महिलांवरील भेदभाव कमी होईल आणि त्यांना अधिक स्वातंत्र्य प्राप्त होईल.
हा निर्णय इराणमधील महिलांसाठी केवळ वाहतूक स्वातंत्र्यापुरता मर्यादित नाही, तर सामाजिक समानतेसाठीही महत्त्वाचा टप्पा मानला जात आहे. सध्या इराणी महिलांमध्ये आनंदाचे वातावरण पसरले असून, हा निर्णय त्यांच्या हक्कांच्या बदलाच्या दिशेने सकारात्मक संदेश देतो.
दिनेश दानवे
डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर येथून पदवी आणि मराठवाडा मित्र मंडळाचे वाणिज्य महाविद्यालय, पुणे येथून पत्रकारिता अभ्यासक्रमात पदव्युत्तर शिक्षण पूर्ण केले आहे. डिजिटल आणि सोशल मीडिया हाताळण्याचा अनुभव असून राजकारण, मनोरंजन आणि शेती या विषयांमध्ये विशेष रस आहे. प्रिंट आणि डिजिटल माध्यमांमध्ये इंटर्नशिपचा अनुभव घेतला असून सध्या दै. मुंबई तरुण भारत मध्ये वेब उपसंपादक म्हणून कार्यरत आहेत.