Donald Trump : व्हेनेझुएलानंतर आता कोलंबियाही रडारवर, डोनाल्ड ट्रम्प यांनी दिली धमकी; म्हणाले, "कोलंबिया देखील..."

मुंबई : (Donald Trump On Colombia) अमेरिकेने व्हेनेझुएलावर हवाई हल्ला करत व्हेनेझुएलाचे राष्ट्राध्यक्ष निकोलस मादुरो यांच्यासह त्यांच्या पत्नीला अटक केलं आहे. निकोलस मादुरो यांच्यावर आता अमेरिकेत खटला चालवला जाणार आहे. मात्र, अमेरिकेने व्हेनेझुएलावर केलेल्या या कारवाईवर जगातील अनेक देशांनी निषेध व्यक्त केला आहे. तसेच व्हेनेझुएला सरकारने या हल्ल्याला 'साम्राज्यवादी हल्ला' असे म्हटले आहे.

अमेरिकेच्या कारवाईनंतर व्हेनेझुएलाच्या लष्कराने आता देशाच्या नवीन अंतरिम राष्ट्रपती म्हणून डेल्सी रॉड्रिग्ज यांना मान्यता दिली आहे. डोनाल्ड ट्रम्प यांनी व्हेनेझुएलावर दुसऱ्या लष्करी हल्ल्याची धमकी दिली आहे. नव्या नेतृत्वाने वॉशिंग्टनच्या अटी मान्य न केल्यास व्हेनेझुएलाला पुन्हा एकदा लष्करी कारवाईला सामोरे जावे लागेल, असा थेट इशारा ट्रम्प यांनी दिला आहे.

व्हेनेझुएलावरील हल्ल्यानंतर आता अमेरिकेचे राष्ट्राध्यक्ष डोनाल्ड ट्रम्प यांनी लॅटिन अमेरिकेतील कोलंबियाला थेट लष्करी कारवाईची धमकी दिली आहे. रविवारी पत्रकारांशी संवाद साधताना ते म्हणाले, "कोलंबिया देखील खूप आजारी देश आहे. ज्यावर एका आजारी व्यक्तीचे राज्य आहे, ज्याला कोकेन बनवायला आणि ते अमेरिकेला विकायला आवडते. मात्र, ते तो जास्त काळ करू शकणार नाही", असे डोनाल्ड ट्रम्प यांनी म्हटले आहे. यावेळी एअर फोर्स वनमध्ये पत्रकारांनी ट्रम्प यांना प्रश्न विचारला की, अमेरिका कोलंबियाविरुद्ध लष्करी कारवाई करणार का? या प्रश्नावर उत्तर देताना डोनाल्ड ट्रम्प सूचकपणे उत्तर दिले की, "मला ते योग्य वाटतं."