आयुष–अनुष्काची ‘जब्राट’ जोडी, मालिकेनंतर आता सिनेमातही दिसणार

मुंबई : छोट्या पडद्यावरून थेट प्रेक्षकांच्या हृदयात घर करणारी आयुष संजीव आणि अनुष्का सरकटे ही लोकप्रिय जोडी आता मराठी रुपेरी पडद्यावर नव्या, झकास आणि रोमँटिक अंदाजात झळकण्यासाठी सज्ज झाली आहे. मालिकेमधील त्यांच्या केमिस्ट्रीनंतर ही जोडी पुन्हा कधी एकत्र दिसणार, याची उत्सुकता चाहत्यांमध्ये दीर्घकाळापासून होती. आता ती उत्सुकता संपणार असून, ‘जब्राट’ या बहुप्रतीक्षित मराठी चित्रपटातून आयुष–अनुष्काची ‘जब्राट’ जोडी प्रेक्षकांच्या भेटीला येत आहे.
 

प्रगती कोळगे दिग्दर्शित ‘जब्राट’ या चित्रपटात आयुष संजीव आणि अनुष्का सरकटे अनुक्रमे प्रिन्स आणि निशा या व्यक्तिरेखांमध्ये दिसणार आहेत. कॉलेज जीवनातील प्रेम, मैत्री, स्वप्नं आणि भावविश्व यांचा सुरेख मिलाफ या चित्रपटातून मांडण्यात येणार आहे. नव्या वर्षात येत्या ६ फेब्रुवारी रोजी हा चित्रपट प्रदर्शित होणार असून, नुकताच प्रदर्शित झालेला चित्रपटाचा शानदार पोस्टर आणि ‘तू आणि मी’ हे रोमँटिक गाणं प्रेक्षकांमध्ये आधीच चर्चा निर्माण करत आहे.

मुख्य जोडीसोबतच या चित्रपटात वनिता खरात, श्रेया शंकर, राहुल चव्हाण, पुण्यकर उपाध्याय, आयली घिया, हिंदवी पाटील, मंदार मोकाशी, डॉ. ऋषभ गायकवाड, सोहम कांबळे, विक्रम आल्हाट आणि प्रगती कोळगे हे कलाकार महत्त्वाच्या भूमिकांमध्ये दिसणार आहेत. याशिवाय संजय मोने, सुरेखा कुडची, जयवंत वाडकर आणि गणेश यादव यांसारख्या अनुभवी कलाकारांची उपस्थिती चित्रपटाला अधिक वजनदार बनवते.

संगीताच्या बाबतीतही ‘जब्राट’ खास ठरणार आहे. चित्रपटाचं संगीत डॉ. जयभीम शिंदे यांनी दिलं असून, बेला शेंडे, आर्या आंबेकर, वैशाली माडे, नंदेश उमप, अनुराग जगदाळे, स्वराज्य भोसले, राजनंदिनी मगर आणि स्वाती शिंदे यांच्या आवाजांनी गाण्यांना अधिक रंगत आणली आहे.
एकंदरीतच, तरुणाईच्या भावविश्वाला स्पर्श करणारा, प्रेम–मैत्रीचा गोडवा, धमाल संगीत आणि जबरदस्त केमिस्ट्री असलेला ‘जब्राट’ हा चित्रपट येत्या फेब्रुवारीत मराठी प्रेक्षकांसाठी खास मेजवानी ठरणार आहे. आयुष–अनुष्काची ‘जब्राट’ जोडी मोठ्या पडद्यावर किती धमाल उडवते, हे पाहणं नक्कीच उत्सुकतेचं ठरणार आहे.