पंतप्रधान मोदींच्या वाढदिवसानिमित्त राज्यातील ७५ हजार प्रशिक्षणार्थींना मिळणार प्रशिक्षण - मंत्री मंगलप्रभात लोढा

मुंबई : पंतप्रधान नरेंद्र मोदी यांच्या अमृत महोत्सवी वाढदिवसाचे औचित्य साधून दरवर्षी ७५ हजार प्रशिक्षणार्थींना 'मुख्यमंत्री अल्पमुदतीचे रोजगारक्षम अभ्यासक्रम' कार्यक्रमातून प्रशिक्षित करण्याचा निर्णय कौशल्य, रोजगार, उद्योजकता व नाविन्यता विभागाने घेतला आहे. लवकरच पंतप्रधान प्रधानमंत्री नरेंद्र मोदी यांच्या हस्ते पहिल्या तुकडीचे ऑनलाईन उद्घाटन करण्यात येणार असल्याची माहिती कौशल्य, रोजगार, उद्योजकता व नाविन्यता मंत्री मंगलप्रभात लोढा यांनी सोमवार, २९ सप्टेंबर रोजी दिली.

येत्या ९ ऑक्टोबर २०२५ पासून राज्यातील ४१९ शासकीय औद्योगिक प्रशिक्षण संस्था (आयटीआय) आणि १४१ शासकीय तांत्रिक विद्यालयांतून एकूण २ हजार ५०६ तुकड्या सुरू होणार आहेत. पंतप्रधान नरेंद्र मोदी यांच्या हस्ते पहिल्या तुकडीचे ऑनलाईन उद्घाटन लवकरच करण्यात येणार असून या अभ्यासक्रमासाठी रोजगार इच्छुक तरुणांनी त्वरित नोंदणी करावी, असे आवाहन मंत्री लोढा यांनी केले.

मंत्री मंगलप्रभात लोढा म्हणाले की, "तरुणांना अल्प कालावधीत रोजगाराभिमुख प्रशिक्षण देऊन उद्योगाच्या गरजेनुसार कुशल मनुष्यबळ निर्माण करणे, युवांना कौशल्याधिष्ठित स्वयंरोजगाराच्या संधी निर्माण होण्यासाठी महिला उमेदवार आणि ग्रामीण भागातील युवकांना मोठ्या प्रमाणावर कौशल्य प्रशिक्षणाची उपलब्धता करून देणे तसेच आधुनिक तंत्रज्ञानातील नवीन व्यवसायांमध्ये महाराष्ट्राला आघाडीवर नेण्यासाठी ही योजना महत्त्वपूर्ण भूमिका बजावणार आहे."

प्रवेश प्रक्रियेसाठी कार्यपद्धती

शासनाने राज्यातील औद्योगिक प्रशिक्षण संस्था तसेच तांत्रिक विद्यालय केंद्रांमध्ये पायाभूत सुविधांचा उपयोग करून संस्थेच्या वेळेव्यतिरिक्त वेळेत मुख्यमंत्री अल्पमुदतीचे रोजगारक्षम अभ्यासक्रम कार्यक्रम सुरू करण्याचा निर्णय घेतला आहे. या अनुषंगाने प्रमाणित कार्यपद्धती निश्चित करण्यात आली असून ऑनलाईन प्रवेश प्रणाली विकसित करण्यात आली आहे. अल्पमुदत अभ्यासक्रमांमध्ये २५ टक्के जागा संस्थेतील विद्यार्थ्यांसाठी राखीव ठेवण्यात आल्या असून उर्वरित जागा बाह्य उमेदवारांना उपलब्ध असतील. याकरिता १ हजार ते ५ हजार रुपये प्रति महिना इतके प्रशिक्षण शुल्क आकारण्यात येईल. शासनाच्या ४१९ शासकीय औद्योगिक प्रशिक्षण संस्था आणि १४१ शासकीय तांत्रिक विद्यालयांमध्ये हे प्रशिक्षण देण्यात येणार आहे. या अभ्यासक्रमांसाठी आयटीआयमध्ये प्रशिक्षण घेत असलेले आणि आय.टी.आय.पूर्ण केलेले विद्यार्थी, उच्च व तंत्र शिक्षणातील पदविका,पदवी व इयत्ता १० वी व १२ वी शिक्षण घेत असलेले आणि पूर्ण केलेल्या विद्यार्थ्यांचा समावेश असेल.

कोणते अभ्यासक्रम असणार?

मुख्यमंत्री अल्पमुदतीचे रोजगारक्षम अभ्यासक्रम कार्यक्रमांतर्गत विविध नवयुगीन आणि पारंपरिक रोजगाराभिमुख अल्पकालीन व्यवसाय अभ्यासक्रम शिकविले जाणार आहेत. यामध्ये अ‍ॅडिटिव्ह मॅन्युफॅक्चरिंग, एरोस्पेस स्ट्रक्चर फिटर, इंटरनेट ऑफ थिंग्ज, इलेक्ट्रिक व्हेईकल, सोलर एनर्जी, ड्रोन तंत्रज्ञान, सोशल मीडिया इन्फ्लुएंसर, सायबर सुरक्षा, आर्टिफिशियल इंटेलिजंस, ग्रीन हायड्रोजन, मोबाईल रिपेअर टेक्निशियन इत्यादी अभ्यासक्रमांचा समावेश आहे.

अभ्यासक्रमासाठी नोंदणी कशी करणार?

या रोजगाराभिमुख अल्पकालीन व्यवसाय अभ्यासक्रमासाठी व्यवसाय शिक्षण व प्रशिक्षण संचालनालयाच्या https://admission.dvet.gov.in या संकेतस्थळावर नोंदणी करावी. अधिक महिती आणि प्रवेश नोंदणीसाठी जवळच्या शासकीय औद्योगिक प्रशिक्षण संस्था किंवा शासकीय तांत्रिक विद्यालयाला संपर्क साधावा, असे आवाहन करण्यात आले आहे.