लाडक्या बहिणींना ई-केवायसी बंधनकारक; २ महिन्यांची मुदत

मुंबई : मुख्यमंत्री माझी लाडकी बहिण योजनेच्या लाभ घेणाऱ्या महिलांना आता ई-केवायसी करणे बंधनकारक करण्यात आले आहे. महिला व बालविकास मंत्री आदिती तटकरे यांनी याबद्दलची माहिती दिली असून त्यासंदर्भातील शासन निर्णयही जारी करण्यात आला आहे.

मंत्रीमंडळाने घेतलेल्या निर्णयानुसार, दरवर्षी जून महिन्यात लाडकी बहिण योजनेतील लाभार्थ्यांचे ई-केवायसी करायचे आहे. मुख्यमंत्री माझी लाडकी बहिण योजनेअंतर्गत पात्र लाभार्थी महिलांची पडताळणी आणि प्रमाणीकरण करण्यासाठी ई-केवायसीच्या माध्यमातून आधार प्रमाणीकरण करण्यास शासनाने मान्यता दिली असल्याचे या शासन निर्णयात नमूद करण्यात आले आहे.

ई-केवायसी कुठे कराल?

मुख्यमंत्री माझी लाडकी बहिण योजनेच्या ladakibahin.maharashtra.gov.in या वेब पोर्टलवर ई-केवायसी सुविधा उपलब्ध करून देण्यात आली आहे.

...तर कारवाई होणार

लाडकी बहिण योजनेतील पात्र महिलांनी २ महिन्यांच्या आत ई-केवायसीची प्रक्रिया पूर्ण करणे बंधनकारक आहे. ज्या महिलांनी विहित कालावधीत आधार प्रमाणीकरण केले नाही त्या पुढील कारवाईस पात्र राहतील, असेही या शासन निर्णयात स्पष्टपणे नमूद करण्यात आले आहे. तसेच या योजनेअंतर्गत दरवर्षी जून महिन्यापासून २ महिन्यांच्या कालावधीत योजनेच्या लाभार्थ्यांनी e-KYC करणे बंधनकारक राहील.

मुख्यमंत्री माझी लाडकी बहीण योजनेत पारदर्शकतेला सर्वोच्च प्राधान्य आहे. या योजनेतील सर्व लाभार्थी भगिनींसाठी https://ladakibahin.maharashtra.gov.in या वेब पोर्टलवर e-KYC सुविधा उपलब्ध करून देण्यात आली आहे. योजनेच्या सर्व लाभार्थी भगिनींनी आजपासून पुढील २ महिन्यांच्या आत सदर e-KYC प्रक्रिया पूर्ण करावी ही नम्र विनंती. ही प्रक्रिया अतिशय सहज, सोपी आणि सुलभ असून योजनेमध्ये पारदर्शकता कायम ठेवण्यासाठी, पात्र लाभार्थ्यांना नियमित लाभ मिळण्यासाठी सर्वांनी ही प्रक्रिया पूर्ण करावी. ही प्रक्रिया आपल्याला भविष्यातील इतर शासकीय योजनांचा लाभ मिळवण्यासाठीही उपयुक्त ठरणार आहे."

- आदिती तटकरे, महिला व बालविकास मंत्री