मुंबईत खाशाबा जाधव पारंपरिक क्रीडा महाकुंभचे आयोजन ; मंत्री मंगलप्रभात लोढा यांच्या संकल्पनेतून पारंपरिक खेळांना मिळणार पूनर्वैभव

मुंबई : कौशल्य विकास मंत्री मंगलप्रभात लोढा यांच्या संकल्पनेतून पुण्यश्लोक अहिल्यादेवी होळकर यांच्या स्मृतीदिनानिमित्त मुंबईत ऑलिम्पिकवीर खाशाबा जाधव पारंपरिक क्रीडा महाकुंभचे आयोजन करण्यात आले आहे. या माध्यमातून लेझिम, फुगडी आणि लगोरी, विटी दांडूसह शिवकालीन पारंपरिक खेळांना पूनर्वैभव मिळवून देणार असल्याचे मंत्री लोढा यांनी म्हटले आहे. 

येत्या १३ ते २२ ऑगस्ट दरम्यान मुंबईकरांना कुर्ला येथे जामसाहेब मुकादम शासकीय औद्योगिक प्रशिक्षण संस्थेच्या मैदानात पारंपरिक खेळांचा थरार पाहायला मिळणार आहे. याविषयी बोलताना मंत्री मंगलप्रभात लोढा म्हणाले की, "आपले पारंपरिक खेळ हे केवळ मनोरंजनाचे साधन नसून तो आपला सांस्कृतिक ठेवाही आहे. काळाच्या ओघात पारंपरिक खेळ दुर्मिळ होत असून नव्या पिढीला शिवकालीन मर्दानी खेळांची ओळख करून देण्याची वेळ आली आहे. पुण्यश्लोक अहिल्यादेवी होळकर यांनी संस्कृती रक्षणासाठी केलेले योगदान आपला देश विसरू शकत नाही. त्यांच्या स्मृतीदिनानिमित्त महाराष्ट्राचे सुपुत्र ऑलिम्पिकवीर खाशाबा जाधव यांच्या नावे हा क्रीडा महाकुंभ आयोजित करण्यात आला आहे."

क्रीडा महाकुंभात कोणत्या खेळांचा समावेश?

"पारंपरिक खेळांच्या या क्रीडा महाकुंभात कब्बडी, खो-खो, लगोरी, लेझीम, रस्सीखेच, मल्लखांब, पावनखिंड दौड, कुस्ती, पंजा लढवणे, विटी-दांडू,दोरीच्या उड्या, फुगडी आणि योग या क्रीडा प्रकारात महिला आणि पुरुष गटातील सामन्यांचे आयोजन करण्यात आले आहे. क्रीडा भारती या संस्थेच्या माध्यमातून मुंबई परिसरातून मोठ्या प्रमाणात या स्पर्धेसाठी नोंदणी सुरु करण्यात आली आहे. विविध शाळा,आयटीआय आणि महाविद्यालयांनीही क्रीडा भारती यांच्याशी संपर्क केला आहे. कुर्ला इथे जामसाहेब मुकादम शासकीय औद्योगिक प्रशिक्षण संस्थेच्या मैदानात होणाऱ्या या क्रीडा महाकुंभात ही जनतेने सहभागी व्हावे," असे आवाहनही मंत्री मंगलप्रभात लोढा यांनी केले आहे. दरम्यान, ज्या संस्थांना आणि क्रीडा मंडळांना यात सहभागी व्हायचे असेल त्यांनी ९८६७०६६५०६ अथवा ९७६८३२७७४५ या भ्रमणध्वनी क्रमांकावर संपर्क साधावा, असे क्रीडा भारतीकडून सांगण्यात आले आहे.