लालबागचा राजा, चिंचपोकळीच्या चिंतामणी दर्शनाला जाणाऱ्यांसाठी विशेष सोय ; गणेशोत्सवानिमित्त मध्य रेल्वेवर विशेष व्यवस्था

मुंबई, मध्य रेल्वेने गणेशोत्सवानिमित्त अतिरिक्त गर्दीचे विभाजन करण्यासाठी मडगाव, सावंतवाडी रोड, रत्नागिरी, खेड, चिपळूण, पुणे, नागपूर यासह विविध ठिकाणी ३०६ विशेष रेल्वेगाड्या चालविण्यास सुरुवात केली आहे. तसेच लालबागचा राजा, चिंचपोकळीचा चिंतामणी सह लालबाग, परळ भागात जाणाऱ्या प्रवाशांसाठी मध्य रेल्वेने मुंबईतही विशेष व्यवस्था केली आहे.

छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे व पनवेल स्थानकांवर दि. २२ ऑगस्ट ते ३० ऑगस्ट २०२५ या कालावधीत नियंत्रणाची जबाबदारी पार पाडण्यासाठी अधिकारी नियुक्त करण्यात आले आहेत. गणेशोत्सवातील प्रवासी ओघ सुरळीत ठेवण्यासाठी छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे व पनवेल स्थानकांवर वाणिज्यिक निरिक्षक नियुक्त करण्यात आले आहेत. या कालावधीत छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे व पनवेल स्थानकांवर गर्दी नियंत्रणासाठी सुमारे १८० तिकीट तपासणी कर्मचारी सतत (२४x७) तैनात करण्यात आले आहेत.

चिंचपोकळी व करी रोड स्थानकांवर दिवसरात्र अतिरिक्त तिकीट तपासणी कर्मचारी तैनात करण्यात आले आहेत. चिंचपोकळी, करी रोड, भायखळा, परळ, दादर, कॉटन ग्रीन, वडाळा रोड, ठाणे व पनवेल स्थानकांवर अतिरिक्त तिकीट सुविधा उपलब्ध करून देण्यासाठी ३० मोबाईल-यूटीएस यंत्रणा वितरित करण्यात आल्या आहेत. चिंचपोकळी, करी रोड, भायखळा, परळ, दादर व कॉटन ग्रीन स्थानकांवर २७.०८.२०२५ पासून दहा दिवसांसाठी मोबाईल-यूटीएस व यूटीएस ॲप प्रचार पथक तैनात करण्यात येणार आहे. चिंचपोकळी व करी रोड स्थानकांवर दि. २७.०८.२०२५ पासून प्रत्येकी दोन अतिरिक्त यूटीएस विंडोस सुरू करण्यात येणार आहेत. चिंचपोकळी, करी रोड, भायखळा, परळ, दादर आणि कॉटन ग्रीन स्थानकांवर प्रवाशांच्या सोयीसाठी अतिरिक्त सहाय्यक नियुक्त केले जातील.

शिवाजी महाराज टर्मिनस, दादर, ठाणे, लोकमान्य टिळक टर्मिनस, दिवा, कल्याण आणि पनवेल स्थानकांवरील प्रमुख ठिकाणी श्रीगणेशोत्सव विशेष गाड्यांचे बॅनर्स व स्टँडीज लावण्यात आले आहेत. श्रीगणेशोत्सव विशेष गाड्यांची जाहिरात वृत्तपत्रे आणि सोशल मीडिया यांच्या माध्यमांतून केली जात आहे. नियमित घोषणा सुरळीत पार पडाव्यात यासाठी मुख्य वाणिज्यिक निरीक्षक (घोषक) मध्यवर्ती घोषणा कक्षात तैनात राहतील, अशी माहिती मध्य रेल्वेने दिली आहे.

श्रीगणेशोत्सव विशेष गाड्यांची माहिती स्थानकावरील चौकशी काउंटरवरून मिळवू शकतात किंवा www.enquiry.indianrail.gov.inया संकेतस्थळाला भेट देऊ शकतात तसेच NTES अॅप डाउनलोड करू शकतात. विशेष गाड्यांचे सविस्तर वेळापत्रक आयआरसीटीसी संकेतस्थळावर, रेलवन ॲपवर व संगणकीकृत पीआरएसमध्येही उपलब्ध आहे.