महसूलमंत्र्यांचा ऐतिहासिक निर्णय; पुणे जिल्ह्यातील वेल्हे तालुक्याचे नाव आता 'राजगड'

मुंबई : राजगड किल्ल्याच्या पायथ्याशी असलेल्या पुणे जिल्ह्यातील वेल्हे तालुक्याचे नामकरण 'राजगड' करण्याचा निर्णय राज्य सरकारने घेतला आहे. महसूलमंत्री चंद्रशेखर बावनकुळे यांनी गुरुवार, २१ ऑगस्ट रोजी याबाबतचा निर्णय जाहीर केला.

महसूल मंत्री चंद्रशेखर बावनकुळे यांनी मुख्यमंत्री देवेंद्र फडणवीस यांच्या सूचनेनंतर हा नामकरणाचा निर्णय घेतल्याचे सांगितले. ते म्हणाले की, "राजगड या नावाचे ऐतिहासिक महत्त्व आणि वेल्हे गावकऱ्यांची जिव्हाळ्याची मागणी लक्षात घेऊन राजगड नावाला केंद्र सरकारच्या गृह विभागाने ६ मे २०२५ रोजी मान्यता दिली. वेल्हे तालुक्यातील ७० पैकी ५८ ग्रामपंचायती तसेच पुणे जिल्हा परिषदेने २२ नोव्हेंबर २०२१ रोजी नाव बदलाचा ठराव मंजूर केला. यावर ५ मे २०२२ रोजी पुणे विभागीय आयुक्तांनी आपला सविस्तर अहवाल शासनास सादर केला होता. १६ मार्च २०२४ रोजी नामबदलासंदर्भात शासनाने अधिसूचना प्रसिद्ध केली. त्यावर कोणत्याच हरकती आणि सूचना प्राप्त झाल्या नाहीत. अखेर महाराष्ट्र जमीन महसूल संहिता १९६६ मधील तरतुदीनुसार नाव बदलाचा अंतिम निर्णय घेण्यात आला," असे त्यांनी सांगितले.

"छत्रपतींचा मावळा असल्याचा मला अभिमान असून महसूलमंत्री म्हणून माझ्यासाठी हा निर्णय अतिशय आनंदाचा आहे. छत्रपती शिवाजी महाराजांनी याच किल्ल्यावरून त्यांचे शासन केले होते. ऐतिहासिक वारश्याशीसंबंधीत हा निर्णय राज्यातील १४ कोटी जनतेसाठीही सुखद आहे. मी मुख्यमंत्री देवेंद्र फडणवीस यांचे यासाठी विशेष आभार मानतो.

- चंद्रशेखर बावनकुळे, महसूलमंत्री, महाराष्ट्र