मरोळ मच्छीमार्केटच्या कामाचा मंत्री नितेश राणेंकडून आढावा

मुंबई, मुंबईतील मरोळ येथे उभारण्यात येत असलेले मच्छी मार्केट सर्व सोयींनी युक्त आणि सुसज्ज असावे अशा सूचना मत्स्यव्यवसाय व बंदरे मंत्री नितेश राणे यांनी दिल्या. मंत्रालयात बुधवार,दि.२० रोजी मरोळ मच्छी मार्केट विषयी झालेल्या बैठकीवेळी मंत्री राणे बोलत होते.

यावेळी मत्स्यव्यवसाय विभागाचे सचिव एन रामास्वामी, मत्स्यव्यवसाय आयुक्त किशोर तावडे यांच्यासह संबंधित अधिकारी उपस्थित होते. मच्छीमार्केट उभारण्याची प्रक्रिया गतीने पूर्ण करावी असे सांगून मंत्री राणे म्हणाले की, निधी मंजुरीसह इतर सर्व मंजुरी प्रक्रिया नोव्हेंबर पर्यंत पूर्ण कराव्यात. या मार्केटच्या ठिकाणी कोळी भवन, कम्युनिटी हॉल ही उभारण्यात यावा. तसेच यानंतर पुणे आणि इतर महत्वाच्या शहरांमध्ये मच्छी मार्केट उभारण्याचे प्रस्ताव तयार करावेत, अशा सूचनाही मंत्री राणे यांनी दिल्या. तळघरासह चार मजले असलेल्या या मार्केट मध्ये वाहन पार्किंग, लोडिंग, अनलोडिंग डेक, सुक्या मासळीचा बाजार, बर्फ कारखाना, प्रसाधनगृह, उच्च दर्जाचे मासळी बाजार, कोळी भवन, उपाहारगृह, शीतगृह, प्रशिक्षण हॉल यांचा समावेश असणार आहे.