अतिवृष्टीमुळे होणाऱ्या नुकसानीचे तातडीने पंचनामे करा; मंत्री मकरंद जाधव-पाटील यांचे निर्देश

मुंबई : राज्यात मुसळधार पावसाने सर्वत्र हाहाकार माजला असून अतिवृष्टीमुळे मोठे नुकसान झाले आहे. दरम्यान, अतिवृष्टीमुळे निर्माण होणाऱ्या पूर परिस्थितीमुळे राज्यात शेत पीक, फळ बागांचे नुकसान झाल्यास संबंधित जिल्ह्याच्या जिल्हाधिकाऱ्यांनी तातडीने नुकसानीचे पंचनामे करावे. तसेच त्याचा अहवाल विनाविलंब सादर करावा, असे निर्देश मदत व पुनर्वसन मंत्री मकरंद जाधव-पाटील यांनी सोमवार, १८ ऑगस्ट रोजी दिले आहेत.

मंत्री मकरंद जाधव-पाटील म्हणाले की, "भारतीय हवामान विभागाने विदर्भ, मराठवाडा, कोकण या भागात पुढील चार दिवस अतिवृष्टीचा इशारा दिला आहे. प्रशासनाने या भागातील नागरिकांना तातडीने मदत उपलब्ध करून देण्यासाठी सर्तक राहावे. शासन नागरिकांच्या पाठीशी खंबीरपणे उभे असून नैसर्गिक आपत्तीमुळे बाधित झालेल्या घटकांना त्वरित मदत आणि दिलासा मिळावा यासाठी प्रशासनाने अतिवृष्टी, पुरामुळे बाधितांचे तातडीने पंचनामे करावेत. या नुकसानीचा अहवाल संबधित विभागीय आयुक्तांमार्फत शासनास सादर करावा," असे त्यांनी सांगितले.