मेट्रोला विलंब झाल्याने घाटकोपर स्थानकात तुफान गर्दी

मुंबई : मुंबई मेट्रो मार्ग १ वर तांत्रिक बिघाडामुळे आठवड्याच्या पहिल्याच दिवशी सोमवार,दि.७ रोजी प्रवाशांची विशेषतः कार्यालयात जाणाऱ्या मुंबईकरांची प्रचंड तारांबळ उडाली. तांत्रिक बिघाडामुळे रेल्वेला उशीर झाल्याने बघता बघता घाटकोपर स्थानकासह इतर स्थानकांवर प्रवाशांची गर्दी वाढली. मुंबई मेट्रोच्या अधिकाऱ्यांनी दिलेल्या माहितीनुसार, तांत्रिक बिघाडामुळे रेल्वेला उशीर झाल्याने गर्दी वाढली आहे. टार्गेट स्पीड गाठू न शकल्याने एक ट्रेन मागे घ्यावी लागली. यामुळे वर्सोवा-घाटकोपर मार्ग एकवर धावणाऱ्या मेट्रो उशिराने धावत होत्या. दीर्घकालीन उपाय म्हणून, मुंबई मेट्रो वनने अतिरिक्त कोच खरेदीसाठी इंडिया डेट रिझोल्यूशन कंपनी लिमिटेडद्वारे त्यांच्या कर्ज देणाऱ्या नॅशनल ॲसेट रिकन्स्ट्रक्शन कन्स्ट्रक्शन कंपनी लिमिटेड यांना मेट्रो वनने प्रस्ताव सादर केला आहे,अशी माहिती मेट्रो वन प्रशासनाने दिली आहे.

मात्र गर्दीच्या वेळी एका एक्स युजरने लिहिले की,'१ सेवा रद्द झाल्यामुळे प्रवाशांचे प्रचंड हाल झाले. मुंबई मेट्रो लाईन १ मधील तांत्रिक अडचणी दरम्यान घाटकोपर स्टेशनवर चेंगराचेंगरीसारखी परिस्थिती निर्माण झाली आहे. कोणीही जीव गमावण्यापूर्वी वेगाने कारवाई करा. मेट्रो वनला ६ बोगी रेक आणि ३ पट करंट रेकची आवश्यकता आहे.

दरम्यान मेट्रो १ प्रशासनें दिलेल्या माहितीनुसार, गर्दीच्या वेळेत मुंबई मेट्रो वनची सध्याची वहन क्षमता सुमारे ६५,००० आहे आणि ३ मिनिटे २० सेकंदांच्या सेवा वारंवारतेसह ३६ ट्रेन फेऱ्या चालवते. जेव्हा जेव्हा सेवेत व्यत्यय येतो तेव्हा त्या वेळी फेऱ्या रद्द केल्या जातात आणि वहन क्षमता प्रति ट्रिप सुमारे १,७५० ने कमी होते. अशा गमावलेल्या फेऱ्यांची भरपाई हॉट-स्टँड-बाय ट्रेनच्या मदतीने अतिरिक्त सेवा समाविष्ट करून केली जाते. सोमवार,दि.७ रोजी एक ट्रिप रद्द झाल्यामुळे घाटकोपरमध्ये सुमारे ५०० अतिरिक्त प्रवासी जमा झाले आणि हा अनुशेष सुमारे ४५ मिनिटे चालू राहिला, ज्यामुळे ५०० प्रवासी मेट्रो परिसरात प्रवेश करण्यासाठी वाट पाहत होते.

एप्रिल ते जून २०२५ दरम्यान, मुंबई मेट्रो वनने नाविन्यपूर्ण मिक्स लूप सेवा सुरू केल्या. यात घाटकोपर आणि अंधेरी दरम्यान चांगल्या वारंवारतेसह पर्यायी सेवा चालवण्यात आली आणि मेट्रो वनच्या ८८% प्रवाशांना सेवा पुरवण्यात आली. मात्र मिक्स लूप सेवांमुळे वर्सोवा, डीएन नगर आणि आझाद नगर येथून प्रवास करणाऱ्या १२% प्रवाशांची वारंवारता कमी झाली. प्रवाशांच्या प्रतिसादाच्या आधारे, मुंबई मेट्रो वनने १६ जून २०२५ पासून मिक्सलूप ऑपरेशन्स बंद केले. या सेवा बंद करण्यात आल्या असल्या तरी, मेट्रो वनने एकूण ४५२ ट्रिप अतिरिक्त ट्रिप चालवून सेवा कार्यक्षमता सुधारली आहे. मेट्रोचा वेग सुधारून ऑपरेशन्स अधिक ऑप्टिमाइझ करण्याचे प्रयत्न सुरू आहेत. मुंबई मेट्रो वन मिक्स-लूप सेवा पुन्हा सुरू करण्याचा विचार करत आहे. प्रामुख्याने, गर्दीच्या वेळी घाटकोपर आणि अंधेरी दरम्यान पर्यायी शॉर्ट-लूप सेवा सुरु करण्याचे विचाराधीन आहे, असेही मेट्रो वन प्रशासनाने नमूद केले आहे.