घाटकोपरच्या खंडोबा टेकडीवरील ३०० झाडे तोडणाऱ्या बिल्डरवर फौजदारी कारवाई होणार
10-Jul-2025
Total Views |
मुंबई : घाटकोपर पश्चिम येथील श्री खंडोबा टेकडीवरील ३०० झाडे तोडणाऱ्या बिल्डरची चौकशी करून, दोषी आढळल्यास त्याच्यावर फौजदारी गुन्हा दाखल केला जाईल, अशी घोषणा वनमंत्री गणेश नाईक यांनी गुरुवारी विधानसभेत केली. भाजप आमदार राम कदम यांनी औचित्याच्या मुद्द्याद्वारे हा विषय उपस्थित केला होता.
राम कदम म्हणाले, "घाटकोपर पश्चिम मतदारसंघातील श्री खंडोबा टेकडीवरील ३०० झाडे तोडण्यामागे बिल्डरचा हात आहे. याप्रकरणी सदोष मनुष्यवधाचा गुन्हा नोंदवावा. तसेच, या टेकडीवर सामाजिक वनीकरण विभागामार्फत वृक्षारोपण करावे. सिलिकॉन व्हॅली प्रकल्पासाठी डोंगर पोखरले जात असून, याची गंभीर दखल घेऊन कारवाई करावी."
वनमंत्री गणेश नाईक यांनी सांगितले, "खंडोबा टेकडीवरील झाडे तोडल्याप्रकरणी चौकशी करून दोषींवर फौजदारी गुन्हा नोंदवला जाईल. दोन्ही टेकड्यांवर वनीकरण केले जाईल. सिलिकॉन व्हॅली प्रकल्प वनविभागाच्या अखत्यारीत येत असल्यास, कोणत्याही भेदभावाशिवाय कठोर कारवाई केली जाईल."
सुहास शेलार
'दै. मुंबई तरुण भारत'मध्ये 'मंत्रालय प्रतिनिधी' म्हणून कार्यरत. मुंबई विद्यापीठातून पत्रकारितेचे पदव्युत्तर शिक्षण. गेल्या आठ वर्षांपासून पत्रकारिता क्षेत्रात कार्यरत. महाराष्ट्राचे राजकारण आणि त्यासंबंधीच्या वृत्तांकनामध्ये विशेष रस. २०१४, २०१९ आणि २०२४ सालच्या लोकसभा आणि विधानसभा निवडणुकांचे वार्तांकन. २०१८ साली राजस्थानमध्ये झालेल्या विधानसभा निवडणुकीच्या प्रत्यक्ष वार्तांकनाचा अनुभव.