सागरी सुरक्षा भक्कम करण्याच्या दिशेने आणखी एक पाऊल! भाऊचा धक्का येथे नवीन गस्ती नौका; मंत्री नितेश राणेंकडून पाहणी

मुंबई : सागरी सुरक्षा भक्कम करण्याच्या दिशेने आणखी एक पाऊल टाकत भाऊचा धक्का येथे नवीन गस्ती नौका तैनात करण्यात आल्या आहेत. दरम्यान, मंगळवार, १७ जून रोजी मंत्री नितेश राणे यांनी या गस्ती नौकेची पाहणी केली. तसेच सागरी सुरक्षेला शासनाचे नेहमीच प्राधान्य राहणार असल्याचे त्यांनी सांगितले.

यावेळी मत्स्यव्यवसाय आयुक्त किशोर तावडे यांच्यासह मत्स्यव्यवसाय विभागाचे अधिकारी कर्मचारी तसेच गस्ती नौका पुरवठादार कंपनीचे प्रतिनिधी उपस्थित होते. मंत्री नितेश राणे म्हणाले की, "सागरी सुरक्षा हा एक महत्वाचा विषय असून त्याला राज्य शासनाचे नेहमीच प्राधान्य आहे. सागरी सुरक्षेच्या दृष्टीने राज्यात ड्रोन टेहळणी सुरक्षा यंत्रणा निर्माण करण्यात आली आहे. या यंत्रणेला अधिक बळकटी देण्यासाठी आता नवीन हाय स्पीड गस्ती नौका तैनात करण्यात येत आहेत. या नौकांमुळे अवैध मासेमारी रोखण्यासह किनारपट्टीवरील सुरक्षा आणखी मजबूत होणार आहे. अत्याधुनिक तंत्रज्ञानाने सज्ज असलेल्या या नौकांमुळे मच्छिामारांचीही सुरक्षा होणार आहे. अशा प्रकारच्या एकूण १५ बोटी तैनात करण्यात येणार असून आता ५ बोटी तैनात करण्यात आल्या आहेत," असे त्यांनी सांगितले.

ते पुढे म्हणाले की, "मुंबईमध्ये डिसेंबर २०२६ पर्यंत वॉटर मेट्रो सुरू करण्याचे नियोजन आहे. वॉटर मेट्रो हा एक उपयुक्त आणि चांगला प्रकल्प असून यामुळे मुंबईकरांचा वेळ आणि पैसा दोन्ही वाचणार आहे," असेही मंत्री नितेश राणे यांनी सांगितले.

गस्ती नौकेची वैशिष्ट्ये काय?

या अत्याधुनिक गस्ती नौकेमध्ये १५ लोकांच्या बसण्याची क्षमता असल्याने त्यामध्ये सागरी पोलीसही असणार आहेत. तसेच या नौकेस सुझुकी कंपनीची २५० एचपीची दोन इंजिन असून याचा वेग 30 नॉटीकल मैल आहे. अधुनिक तंत्रज्ञानाने सज्ज या नौकेमध्ये रडार, ट्रान्सपॉन्डर, त्वरीत प्रतिक्रीया प्रणाली यांचा समावेश आहे. द्रिष्टी, क्रुझ आणि फेरिस कंपनीची ही नौका संपूर्ण फायबरची आहे. १३ मीटर पेक्षा जास्त लांबी असणाऱ्या या बोटीची इंधन क्षमता ९०० लीटर आहे.