IPL सामना अनपेक्षितपणे रद्द; प्रिती झिंटाकडून चाहत्यांची माफी धर्मशाळा स्टेडियममध्ये काय घडलं?

 

 

 

 

 

 

 

मुंबई : हिमाचल प्रदेशमधील धर्मशाळा येथील HPCA (हिमाचल प्रदेश क्रिकेट असोसिएशन) स्टेडियममध्ये गुरुवारी एक अनपेक्षित घटना घडली. पंजाब किंग्ज आणि दिल्ली कॅपिटल्स यांच्यात सुरू असलेला IPL सामना अवघ्या १०.१ षटकांतच अचानक थांबवण्यात आला. यामुळे स्टेडियममध्ये उपस्थित असलेले हजारो प्रेक्षक आणि चाहत्यांमध्ये गोंधळाची स्थिती निर्माण झाली होती. मात्र या सगळ्या परिस्थितीत अभिनेता आणि पंजाब किंग्जची सह-मालक प्रिती झिंटा हिने मोठ्या संयमाने आणि जबाबदारीने परिस्थिती हाताळली. यानंतर तिने सोशल मीडियावर एक सविस्तर पोस्ट लिहून आपल्या भावना व्यक्त केल्या आणि चाहत्यांची माफीही मागितली.

 

 

 

 

प्रिती ने आपल्या X (पूर्वीचे ट्विटर) अकाऊंटवर लिहिले,

"गेल्या काही दिवसांच्या धावपळी नंतर अखेर घरी पोहोचले आहे. या संकटकाळात भारतीय रेल्वे आणि रेल्वेमंत्री श्री. अश्विनी वैष्णव यांचे मन:पूर्वक आभार. त्यांच्या मदतीने दोन्ही संघ, त्यांच्या कुटुंबीयांसह सर्व अधिकाऱ्यांना आणि कर्मचाऱ्यांना धर्मशाळेतून सुरक्षित आणि आरामदायकपणे बाहेर काढता आले. BCCI सचिव जय शाह, IPL अध्यक्ष अरुण धुमाळ, पंजाब किंग्जचे CEO सतीश मेनन आणि ऑपरेशन्स टीमचे मी खास आभार मानते. त्यांनी जे समन्वय साधला, त्यातून ही प्रक्रिया शांततेत पार पडली."

 

 

 

 

या पोस्टमध्ये प्रिती ने चाहत्यांना उद्देशून लिहिले,

"धर्मशाळा स्टेडियममध्ये जे लोक उपस्थित होते, त्यांना मनापासून धन्यवाद. तुम्ही शांतपणे परिस्थिती हाताळली, कोणताही गोंधळ किंवा चेंगराचेंगरी झाली नाही, हे अत्यंत कौतुकास्पद आहे. मी काही लोकांना फोटोसाठी नकार दिला आणि थोडीशी उद्धट वागले असेल, तर त्याबद्दल मनापासून क्षमस्व. त्या क्षणी माझ्यावर सर्वांच्या सुरक्षिततेची जबाबदारी होती आणि त्या दृष्टीने मला निर्णय घ्यावे लागले. सर्वांची सुरक्षितता हेच माझं प्रथम कर्तव्य होतं."

 

 

 

ही घटना घडल्यानंतर काही वेळातच स्पष्ट झाले की धर्मशाळेजवळील जम्मू आणि पठाणकोट या शहरांमध्ये हवाई हल्ल्याचा इशारा (air raid alerts) मिळाला होता. परिणामी, सुरक्षा यंत्रणांनी तत्काळ कारवाई करत सामना थांबवण्याचा निर्णय घेतला. HPCA स्टेडियममधून खेळाडू, अंपायर्स, ब्रॉडकास्ट क्रू आणि अधिकाऱ्यांना सुरक्षितपणे बाहेर काढण्यात आले. प्रिती झिंटा स्वतः स्टेडियममध्ये उपस्थित होती आणि तिने प्रेक्षकांना शांततेत बाहेर पडण्याचे आवाहन केलं. तिच्या संयमित आणि जागरूक कृतीचे अनेकांनी कौतुक केले.

 

 

 

BCCI च्या अधिकृत निवेदनानुसार, भारत-पाकिस्तान सीमारेषेवर सध्या निर्माण झालेल्या तणावपूर्ण परिस्थितीमुळे IPL स्पर्धा एक आठवड्यासाठी तात्पुरती स्थगित करण्यात आली आहे. सुरक्षेच्या पार्श्वभूमीवर घेतलेला हा निर्णय असून, पुढील परिस्थितीनुसार पुढील कार्यक्रम जाहीर केला जाईल.

 

 

 

ही घटना फक्त एका क्रिकेट सामन्याचे रद्द होणे नव्हते, तर एका मोठ्या समन्वय, संयम आणि जबाबदारीची परीक्षा होती. प्रिती झिंटाने केवळ एका संघमालकाची नाही, तर एका जबाबदार नागरिकाची भूमिका निभावली. संकटसमयी चाहत्यांशी माफी मागणे, तसेच त्यांच्या संयमाचे कौतुक करणे हे तिच्या विनम्रतेचे उदाहरण ठरले. धर्मशाळा स्टेडियममधील ही घटना IPL च्या इतिहासात एक स्मरणीय क्षण ठरली आहे.