WAVES Summit 2025: "बौद्धिक आत्मा म्हणजेच मल्याळम सिनेमा" – अक्षय कुमारची मोहनलालला थेट विचारणा

01-May-2025

Total Views | 12

मुंबई: ( WAVES Summit 2025) वेव्स समिट २०२५ च्या पहिल्या दिवशी जिओ वर्ल्ड कन्व्हेन्शन सेंटरमध्ये सुरु असलेल्या चर्चासत्रांमध्ये अभिनेता अक्षय कुमार आणि मल्याळम सुपरस्टार मोहनलाल यांच्यातील संवादाने विशेष लक्ष वेधून घेतलं. भारतीय सिनेसृष्टीतील बौद्धिकतेबद्दल बोलताना अक्षय कुमारने मल्याळम चित्रपटसृष्टीचा गौरव करत तिला “भारतीय सिनेमाचा बौद्धिक आत्मा” असं संबोधलं.

या चर्चासत्रात अक्षयने मोहनलालला थेट विचारलं, “बौद्धिक सिनेमा आणि कमर्शियल (लोकप्रिय) सिनेमा हे एकत्र का जाऊ शकत नाहीत?” यावर उत्तर देताना मोहनलाल म्हणाले, “कलात्मक आणि व्यावसायिक यश यात फार सूक्ष्म रेषा असते, पण दोन्ही घटक परस्परांशी जोडलेले असतात. मल्याळम चित्रपटसृष्टी ही नेहमीच याचा आदर्श राहिली आहे. आमचे आर्ट फिल्म्सही मनोरंजनात्मक असतात, आणि मनोरंजन करणारे चित्रपटही कलात्मक असतात.”

मोहनलाल यांनी पुढे सांगितलं की, “माझ्या कारकिर्दीत मला अनेक महान दिग्दर्शकांसोबत काम करण्याची संधी मिळाली. त्यांनी मला अशा सिनेमाचा भाग बनवलं जो बौद्धिकतेचा विचार करत होता आणि तरीही प्रेक्षकांनाही जोडून ठेवत होता.” त्यांनी एक हलकीशी चिंता देखील व्यक्त केली की, “आजचे काही नवोदित दिग्दर्शक केवळ कलात्मक सिनेमाच बनवत आहेत, ज्यामुळे मुख्य प्रवाहाशी असलेलं नातं थोडं कमी होतंय.”

या चर्चेतून एक महत्त्वाचा मुद्दा समोर आला की गंभीर विषयांची मांडणी आणि लोकप्रियतेची मागणी या दोन्ही गोष्टी योग्य संतुलन साधल्यास भारतीय सिनेमा जागतिक स्तरावर अधिक प्रगल्भ पातळीवर पोहोचू शकतो. WAVES Summit 2025 च्या या सत्राने प्रेक्षकांना केवळ मनोरंजन न करता विचार करण्याची एक नवी दिशा दिली. अक्षय कुमार आणि मोहनलाल यांच्यातील हा अर्थपूर्ण संवाद चित्रपटसृष्टीत नव्या विचारांच्या आणि चर्चेच्या दालनं उघडणारा ठरला.