वाढवण बंदरासाठी ५ हजार कोटींचे पायाभूत सुविधा प्रकल्प

मुंबई (infrastructure development for wadhvan port ) : केंद्रीय मंत्री सर्बानंद सोनोवाल यांच्या उपस्थितीत महाराष्ट्रात उभारण्यात येत असलेल्या पालघर येथील वाढवण बंदरासाठी ५ हजार, ७०० कोटी रुपयांपेक्षा जास्त गुंतवणुकीच्या पायाभूत सुविधा प्रकल्पांच्या विकासासाठी सामंजस्य करारावर स्वाक्षरी करण्यात आली. या कार्यक्रमाला प्रमुख पाहुणे म्हणून उपस्थित असलेले केंद्रीय मंत्री सर्बानंद सोनोवाल यांच्यासह केंद्रीय राज्यमंत्री, ‘एमओएसपीडब्ल्यू’ शंतनू ठाकूर, ‘जवाहरलाल नेहरू बंदर प्राधिकरण’ (जेएनपीए)चे अध्यक्ष उन्मेष शरद वाघ आणि ‘एमओपीएसडब्ल्यू’चे इतर मान्यवर आणि वरिष्ठ अधिकारी उपस्थित होते.

 

या करारांनंतर बोलताना केंद्रीय मंत्री सोनोवाल म्हणाले, “पंतप्रधान नरेंद्र मोदी यांनी वाढवण बंदराला जगातील सर्वोच्च दहा बंदरांपैकी एक बनवण्याचे स्वप्न पहिले आहे. वाढवण बंदर प्रकल्पामुळे भारताची सध्याची सागरी वाहतूक आणि बंदर हाताळण्याची क्षमता तिप्पट होण्याचा अंदाज आहे.”

 

 

हे बंदर सर्व प्रकारच्या हवामानात उपयुक्त ठरणारे, ग्रीन फिल्ड (विकसनशील) डीप ड्राफ्ट (मोठ्या मालवाहक जहाजांसाठी उपयुक्त ठरणारे) प्रमुख बंदर म्हणून केवळ भारताच्या सागरी क्षेत्रासाठीच नव्हे, तर प्रादेशिक व्यापारासाठीदेखील गेम चेंजर म्हणून काम करणार आहे. 2047 सालापर्यंत ‘विकसित भारत’ बनण्याच्या तयारीत असल्याने, हे बंदर एक प्रमुख विकास केंद्र म्हणून काम करण्याची शक्यता आहे. या संदर्भात स्वाक्षरी केलेले सामंजस्य करार वाढवण बंदराच्या पायाभूत सुविधा आणि क्षमता वाढवण्यास आणि पंतप्रधान नरेंद्र मोदी यांचे स्वप्न साकार करण्याच्या दिशेने आणखी एक पाऊल उचलण्यास मदत करतात.

 

 

वाढवण बंदरासाठी करण्यात आलेल्या ५ हजार, ७०० कोटी रुपयांच्या एकूण पायाभूत सुविधा प्रकल्पांपैकी ४ हजार, २०० कोटी रुपयांच्या गुंतवणुकीचे कंटेनर, बल्क आणि लिक्विड कार्गो हाताळण्यासाठी टर्मिनल विकसित करणे, एक हजार कोटी रुपयांच्या गुंतवणुकीचे बल्क आणि लिक्विड कार्गो हाताळण्यासाठी टर्मिनल विकसित करणे आणि ५०० कोटी रुपयांच्या गुंतवणुकीचे द्रवरूप रसायने व संबंधित उत्पादने हाताळण्यासाठी तीन लाख सीबीएम क्षमतेचे द्रवरूप कार्गो जेट्टी आणि टँक फार्म विकसित करणे, या करारांवर स्वाक्षरी करण्यात आली.