संघर्षयोद्धा... कर्मयोगी लोकनेता!

 

 

 

शांत, मनमिळावू, जनतेसाठी 24 तास काम करण्याची व प्रचंड मेहनतीची तयारी, विकासाची दूरदृष्टी, प्रत्येक कामाचे बारकाईने नियोजन व यशस्वी अंमलबजावणी, अशा कितीतरी गोष्टी शिंदे साहेबांबद्दल सांगता येतील. अगदी तळागाळातील सर्वसामान्य शिवसैनिक, सामान्य कार्यकर्त्यांच्या पाठीशी ठाम उभे राहणारे, त्यांना आधार देणारे शिंदे साहेब फक्त शिवसेनेचे नाही, तर खर्‍या अर्थाने महाराष्ट्र राज्याचे कुटुंबप्रमुख बनले आहेत. शिंदे साहेबांची लोकप्रियता दिवसेंदिवस वाढत आहे. कारण, त्यांनी आजवर समर्पित भावनेने स्वतःला झोकून देऊन ठाण्यासह राज्याचा विकासरथ पुढे नेला आहे. त्यांच्या एकसष्टीनिमित्त आणखी विकासकामे करण्याचा संकल्प आम्ही करीत आहोत.

 

घरची गरीब परिस्थिती असल्याने अकरावीपर्यंतचे शिक्षण पूर्ण केल्यानंतर परिस्थितीमुळे त्यांना त्यावेळी शिक्षण अर्धवट सोडावे लागले. मात्र, त्यांच्याकडे शिकण्याची जिद्द आणि इच्छा मात्र प्रबळ होती. त्यामुळेच आयुष्यात काहीसे स्थैर्य आल्यानंतर त्यांनी पुन्हा शिक्षणाला सुरुवात केली. अत्यंत सर्वसामान्य घरातून आलेल्या एकनाथ शिंदे यांनी धर्मवीर आनंद दिघे साहेबांच्या प्रेरणेने वयाच्या अवघ्या 18व्या वर्षी शिवसेनेचा एक सामान्य कार्यकर्ता म्हणून राजकारणात प्रवेश केला. शिंदे साहेबांना त्या काळात आनंद दिघे साहेबांचा चांगला सहवास लाभला. एकनाथ शिंदे यांनी आनंद दिघे साहेबांच्या मनात विश्वास निर्माण केला. आपल्या कामामुळे आणि कामाच्या पद्धतीमुळे एकनाथ शिंदे ठाण्यात सर्वपरिचित झाले. म्हणूनच एकनाथ शिंदे यांना अगदी तरुण वयात म्हणजेच 1984 साली त्यांना किसन नगर येथील शाखाप्रमुखपद देण्यात आले. पक्षात सक्रिय झाल्यावर समाजात जागोजागी होणार्‍या अन्यायाच्या विरोधात आणि मराठी माणसाच्या हितासाठी आक्रमक भूमिका त्यांनी घेतली. शिवाय लोकांच्या अडीअडचणीला ते धावून गेले. शिवसेनेच्या प्रत्येक आंदोलनात त्यांनी सहभाग घेतला. महाराष्ट्र-कर्नाटक सीमा आंदोलनात त्यांनी पोलिसांची लाठीही खाल्ली आणि तुरुंगवासही भोगला.

 

माझी आणि शिंदे साहेबांची सामाजिक-राजकीय कारकीर्द एकत्रच सुरु झाली. मी त्यावेळी काँग्रेसची विद्यार्थी संघटना असलेल्या ’एनएसयूआय’चे काम करीत होतो, तर शिंदे साहेब शिवसेनेचे. 1992 मध्ये त्यांना नगरसेवकपदाचे तिकीट मिळाले नाही. पण, शिंदे साहेबांनी आपले पक्ष कार्य आणि समाजकार्य निष्ठेने सुरूच ठेवले. 1997च्या ठाणे महापालिका निवडणुकीत आनंद दिघे साहेब यांनी शिंदे यांना नगरसेवकपद दिले. शिंदे पहिल्याच निवडणुकीत विजयी झाले. पुढे ते दुसर्‍यांदा नगरसेवक, सभागृहनेते झाले. त्यावेळी जरी आमचे पक्ष वेगवेगळे असले तरी स्वर्गीय धर्मवीर आनंद दिघे साहेबांना ठाणे जिल्ह्यातील सर्वच लोक देवासारखे मानत असल्याने ठाण्याचे राजकारण कधीही कलुषित झाले नाही. सगळ्यांची राजकारणापलीकडची मैत्री वाढत गेली, टिकली. तशीच शिंदे साहेब आणि माझेही मैत्रीचे संबंध कायम राहिले. नगरसेवक म्हणून मी आणि शिंदे साहेबांनी एकत्रित राजकीय प्रवास सुरु केला. पुढे शिवसेनेचे ठाणे जिल्हाप्रमुख म्हणून शिवसेना पक्ष वाढविण्यासाठी शिंदे साहेबांनी प्रचंड मेहनत घेतली. खेडोपाडी, गावोगावी पक्षाचा विस्तार केला. विविध आंदोलने, खटले यात गुन्हे दाखल झालेल्या शेकडो शिवसैनिकांना कायदेशीर मदत तर केलीच; शिवाय त्यांच्या कुटुंबीयांचीही काळजी घेतली. प्रत्येक शिवसैनिकांना स्वतःच्या परिवारासारखा मानणारा असा दिलदार, दमदार आणि प्रामाणिक असा आमचा नेता आहे. हजारो कार्यकर्त्यांना सुरुवातीच्या काळात शिंदे साहेबांनी आधार तर दिलाच, पण असंख्य कार्यकर्ते घडवले. ’कार्यकर्ते घडविणारा नेता’ किंवा ’क्रियाशील कार्यकर्ते बनविण्याची फॅक्टरी’ असे एकनाथ शिंदे यांच्याबद्दल म्हटले, तर वावगे ठरणार नाही.

 

मी 2008 मध्ये शिवसेना पक्षात प्रवेश केला आणि 2009 मध्ये आमदार झालो. ठाणे-मीरा भाईंदरच्या जनतेचे विविध प्रश्न, क्लस्टर डेव्हल्पमेंट, पाणीप्रश्न, मेट्रो, वाहतुककोंडी, उड्डाणपूल यासाठी त्यावेळी आम्ही एकत्रित आंदोलने केली. मितभाषी, संयमी पण जनतेसाठी आंदोलनात आक्रमक असलेल्या शिंदे साहेबांच्या नेतृत्वात तेव्हा ठाण्याचा कायापालट व्हायला सुरुवात झाली. ठाण्याचे आमदार म्हणून राज्य सरकारकडून त्यांनी विविध विकासकामे मंजूर करून आणली. आजचे ’बदलते विकसित ठाणे’ हे शिंदे साहेबांच्या तेव्हापासूनच्या दूरदृष्टीचा आणि मेहनतीचा परिणाम आहे.

 

लोकांचे प्रश्न सोडविण्यासाठी कितीही वेळ कष्ट करण्याची तयारी, नम्र, मितभाषी, कडवट शिवसैनिक, सर्वांना सोबत घेऊन राजकारणात यशस्वी व्हायचे कौशल्य अशा एकनाथ शिंदेंच्या अनेक जमेच्या बाजू.

 

धर्मवीर दिघे साहेबांच्या निधनानंतर ठाण्यात शिवसेना टिकवण्यासाठी व वाढविण्यासाठी त्यांनी खूप परिश्रम घेतले. आजही शिवसैनिक आणि ठाणेकर जनतेला त्यांच्यात दिघे साहेबांचेच प्रतिबिंब दिसते. दिघे साहेब गेल्यानंतर ठाण्यात शिवसेना पक्ष वाढवून व टिकवून ठेवण्यात शिंदे साहेबांचे योगदान मोलाचे आहे. ’शिवसेनेचे ठाणे, ठाण्याची शिवसेना’ हे समीकरण आजही कायम आहे. कारण, मंत्री म्हणून राज्याचे नेतृत्व करायची संधी मिळाली तरी ठाण्याला शिंदे साहेबांनी गेल्या दहा वर्षांत जराही अंतर दिले नाही. राज्यात आलेले कोणतेही नैसर्गिक संकट असो की एखादी गंभीर समस्या, शिंदे साहेब तिथे सगळी मदत घेऊन पोहोचलेले आपण पाहिले आहे.

 

एकनाथ शिंदे साहेब हे माननीय शिवसेनाप्रमुख बाळासाहेब ठाकरे यांचे निष्ठावंत आणि धर्मवीर आनंद दिघे साहेब यांच्या तालमीत तयार झाले. त्यांनी निष्ठावंत शिवसैनिक म्हणून संघटनेची ताकद वाढविताना ठाण्यात सुरुवातीला सत्तेच्या माध्यमातून ठाण्याच्या विकासाला गती दिली. पुढे राज्याचे सार्वजनिक बांधकाममंत्री व ठाणे जिल्हा पालकमंत्री म्हणून त्यांनी कर्तबगारीची छाप उमटवली. महाराष्ट्राचे गेले अडीच वर्षे मुख्यमंत्री म्हणून त्यांच्या कार्यकाळात माझ्या विधानसभा मतदारसंघात ठाणे, मीरा-भाईंदरला भरभरून विकास निधी मिळाला. त्याचबरोबर राज्यातही मेट्रो, हायवे, समृद्धी महामार्ग, मुंबईतील कोस्टल रोड यांसारखे विकास प्रकल्प पूर्ण झाले आणि राज्य सरकारने शेकडो ऐतिहासिक निर्णय घेतले.

 

’मुख्यमंत्री माझी लाडकी बहीण योजना’ ही खर्‍या अर्थाने 2 कोटी, 40 लाख महिलांना आधार देणारी ऐतिहासिक योजना शिंदे साहेबांनी महायुती सरकारच्या माध्यमातून आणली आणि ती तत्काळ अंमलबजावणीही करून दाखवली. तसेच मी सूचविलेली ’मुख्यमंत्री तीर्थ दर्शन योजना’ लागू झाली. ज्यामुळे ज्येष्ठ नागरिक सरकारच्या अनुदानातून देशातील आपल्या इच्छित तीर्थस्थळी दर्शन घेऊ शकत आहेत. शिंदे साहेबांनी सर्व समाजघटकांसाठी विविध क्रांतिकारी निर्णय घेतले. गेल्या अडीच वर्षांत महाराष्ट्राने विकासाची उंच भरारी घेतली आहे.

 

  2024च्या विधानसभा निवडणुका लढवल्या आणि अभूतपूर्व ’न भूतो न भविष्यति’ असे यश महायुतीला मिळाले. एकनाथ शिंदे साहेबांच्या नेतृत्वात शिवसेनेचे 60 आमदार प्रचंड मतांनी विजयी झाले. अडीच वर्षांत मुख्यमंत्री म्हणून नाही, तर ’कॉमन मॅन’ म्हणून अहोरात्र लोकांमध्ये घेतलेली मेहनत, जनतेत वाढवलेला विश्वास, सरकारच्या कल्याणकारी योजनांचा करोडो लोकांना दिलेला प्रत्यक्ष लाभ, ’सरकार आपल्या दारी’ उपक्रम आणि जनकल्याणकारी योजना यामुळे शिंदे साहेबांच्या नेतृत्वात हे यश महायुतीला मिळाले. महायुतीच्या सत्तेची दुसरी टर्म सुरु झाली असताना, उपमुख्यमंत्री असलेल्या एकनाथ शिंदे साहेबांची ही एकसष्टी साजरी होत आहे. हा आमच्यासाठी आनंदाचा क्षण आहे. आजही ते उपमुख्यमंत्री नाही, तर ’डेडिकेटेड टू कॉमन मॅन’ (डीसीएम) म्हणूनच काम करत आहेत.