कर आकारला म्हणून झोपडपट्टी भागातील व्यावसायिक आस्थापना अधिकृत होत नाही!

 

 

मुंबई : झोपडपट्टी क्षेत्रातील अनधिकृत व्यावसायिक आस्थापनांवर कर आकारणी झाली म्हणजे ती मालमत्ता अधिकृत ठरत नाही, असे स्पष्टीकरण बृहन्मुंबई महानगरपालिका प्रशासनाकडून गुरुवार, ६ फेब्रुवारी रोजी देण्यात आले.

 

बृहन्मुंबई महानगरपालिका प्रशासनाच्या वतीने झोपडपट्टी भागातील सर्व व्यावसायिक आस्थापनांना मालमत्ता कर लागू करण्याचा निर्णय घेण्यात आला आहे. यासोबतच अशा आस्थापनांवर कर आकारणी करण्याच्या अनुषंगाने करनिर्धारण आणि संकलन खात्याच्या वतीने सर्वेक्षणाची कार्यवाहीसुद्धा सुरू करण्यात आली आहे. मात्र, अशाप्रकारची कर आकारणी करण्यात आली म्हणजे संबंधित अनधिकृत व्यावसायिक आस्थापना अधिकृत ठरत नाही," असे महापालिकेकडून स्पष्ट करण्यात आले आहे.

 

 

मुंबई महानगरपालिका अधिनियम १८८८ नुसार, बृहन्मुंबई महानगरपालिकेच्या कार्यक्षेत्रात असलेल्या जमिनी, इमारती तसेच इतर सर्व मालमत्तांवर कर आकारणी करुन त्यांच्याकडून नियमितपणे करसंकलन केले जाते. दरम्यान, महानगरपालिका प्रशासनाच्या वतीने झोपडपट्टी क्षेत्रातील सर्व व्यावसायिक आस्थापनांना मालमत्ता कर लागू करण्याचा निर्णय घेण्यात आला आहे. परंतू, अशाप्रकारे झोपडपट्टी भागात व्यावसायिक आस्थापनांवर मालमत्ता कर आकारणी झाल्याने संबंधित अनधिकृत आस्थापना अधिकृत होतील, असा समज नागरिकांकडून होत असल्याचे निदर्शनास आले.

 

मात्र, मुंबई महानगरपालिका अधिनियम १८८८ मधील कलम १५२ (अ) च्या तरतुदीनुसार, कोणत्याही इमारतीचे किंवा इमारतीच्या भागाचे अवैधरित्या बांधकाम किंवा पुनर्बांधकाम झालेले असल्यास आणि त्यावर प्रशासनाकडून कर आकारणी करण्यात आली असेल, तर याचा अर्थ सदर बांधकाम किंवा पुनर्बांधकाम विनियमित ठरत नाही. त्यामुळे झोपडपट्टी क्षेत्रातील व्यावसायिक आस्थापनांना कर आकारणी करण्यात आली म्हणजे संबंधित अनधिकृत व्यावसायिक आस्थापना अधिकृत ठरत नाही, असे महापालिका प्रशासनाकडून स्पष्ट करण्यात आले आहे.